काठमाडौं (हाम्रो खेलकुद) – काठमाडौं विश्वविद्यालय स्कुल अफ मेडिकल साइन्सद्धारा स्थापित ‘डिन कप’को दोस्रो संस्करण पोखराको मणिपाल शिक्षण अस्पतालले वैशाखमा गर्ने भएको छ । फुटबल, बास्केटबल, भलिबल, क्रिकेट, फुटसल, ब्याडमिन्टन र टेबल टेनिस समावेश डिन कप वैशाख १३ देखि १९ गते सम्म सञ्चालन हुने डिन कप आयोजक समितिले जनाएको छ ।

प्रतियोगिताको सफलताका लागि मणिपालमा अध्ययनरत विद्यार्थीहरु, इन्ट्रन डक्टर, मेडिकल अफिसर, कन्सल्टयान्ट डक्टरहरु लागिपरेको बताइएको छ । ‘२०१९ मणिपाल अल इन्ट्रन मेडिकल कलेज स्पोर्ट मिट’ भन्ने नारा दिइएर डिन कप आयोजना गर्ने तयारी भइरहेको इभेन्ट को–अर्डिनेटर यूजल सुवेदीले जानकारी दिए ।

डिन कपमा काठमाडौ विश्वविद्यालय, त्रिभुवन विश्वविद्यालय, पाटन स्वास्थ्य विज्ञान प्रतिष्ठान, वि.पि. कोइराला स्वास्थ्य विज्ञान प्रतिष्ठान सबैलाई समेटेर लैजाने मिडिया एन्ड न्यूज पब्लिसिटी को–अर्डिनेटर राहुल गोईतले बताए । १५ वटा विभिन्न मेडिकल कलेजका करिब ४ सय विधार्थीले प्रतियोगितामा भाग लिने गोइतले बताए ।

मणिपालले यस डिन कपलाई मेडिकल क्षेत्रमा नै एक प्रतिष्ठित रनिङ सिल्ड बनाई हरेक वर्ष विभिन्न मेडिकल कलेजमा आयोजना गराउने र मेडिकल क्षेत्रमा संलग्न सबैलाई एक आपसमा चिनजान, मित्रता, आदर र नेपालभरका चिकित्सक शास्त्र विद्यार्थीलाई एक ठाउँमा ल्याउने स्पोर्टस कोअर्डिनेटर अभिषेक बानियाँले बताए ।