अर्जुन कार्की, बागलुङ

बागलुङ बजारमा जारी कलेज स्तरिय ९ ए साईड फुटबलको उपाधि चिल्ड्रेन लाईफ ईङ्गलिस बोर्डिङ स्कुलले जितेको छ । प्रतियोगिताको विजेता चिल्ड्रेन लाईफले ५० हजार रुपैयाँ प्राप्त गर्योभने डिग्नीटीले २५ हजार रुपैयाँमा चित्त बुझायो ।

धौलागिरी अञ्चलकै एक मात्र आंगिक क्याम्पस धौलागिरी बहुमुखी क्याम्पसको ५६ औं वार्षिकोत्सवको अवसरमा आयोजना गरिएको उक्त प्रतियोगिताको फाईनल खेलमा चिल्ड्रेन लाईफले डिग्नीटी कलेजलाई २–१ गोलअन्तरले पराजित गरेको हो । फाइनल खेल ७० मिनेटको रहेको थियो ।

फाइनल खेलका तीनै गोल दोस्रो हाफमा सम्भव भएका थिए । खेलको सुरुवातबाट नै आक्रमक रणनीतिमा देखिएको चिल्ड्रेनले पहिलो गोलको लागि दोस्रो हाफसम्म कुर्नुपर्यो । चिल्ड्रेनको लागि खेलको ४३ औं मिनेटमा दिपेश मल्लले गोल गरेका थिए । उनले मिडफिल्डर अजय पुनको क्रसमा गोल गरे ।

चिल्ड्रेनको लागि दोस्रो गोल खेलको ६८ औं मिनेटमा मनोज थापाले गरेका थिए । मैदानको विचभागबाट २ जना डिफेन्डरलाई कुनै मौका नदिई बल अगाडी बढाएका थापाले कर्नर एरियाबाट आकर्षक गोल गरेका थिए ।

डिग्नीटीका विजय केसीले खेलको ६९ औं मिनेटमा सान्त्वना गोल गरे । नारान खत्रीको प्रहार चिल्ड्रेनका गोलरक्षक सौगात खड्काको पञ्चबाट रिबाउन्ड आएको बललाई केसीले गोलमा परिणत गरेका थिए ।