काठमाडौं (हाम्रो खेलकुद)-पश्चमाञ्चल क्षेत्रीय भलिबल संघ राजधानीमा जारी १४औं संस्करणको रेडबुल ढोरपाटन सुजुकी महिला डबल लिग भलिबल प्रतियोगितामा आफ्नो पहिलो खेलमा सामाखुशी इंग्लिस बोर्डिङ स्कुल (सेव) सँग पराजित भएको छ ।

प्रतियोगिता अन्तरगत बिहीबार भएको खेलमा पश्चिमाञ्चल आफ्नो पहिलो खेलमै तीन भारतीय खेलाडी सम्मिलित सेवसँग ३–२ को प्रतिस्पर्धात्मक सेटमा पराजित भएको हो । प्रतस्पर्धात्मक बनेको पहिलो सेट सेवले २७–२५ ले आफ्नो पक्षमा पार्दै पश्चिमाञ्चलमाथि दवाव सिर्जना गरेको थियो ।

खेलमा सुरुवाती अग्रता बनाएपनि पशिचमाञ्चल सेटको मध्यभागतिर पुग्दा पछि परेको थियो । दोस्रो र तेस्रो सेट पश्चिमाञ्चलले २५–२० र २५–१७ ले सहजै आफ्नो पक्षमा पारेपछि खेलमा २–१ को अग्रता बनाएको थियो ।

तर, त्यसपछिको दुवै सेटमा पश्चिमाञ्चलले अग्रता लिएपनि पराजित हुन पुग्यो । चौथो सेट सेवले २५–२२ ले आफ्नो पक्षमा पार्दै खेललाई २–२ को बराबरीमा ल्याएका थिए । तर निर्णायक सेटमा भातीय खेलाडी बालाले उच्च प्रदर्शन गरेपछि १५–८ ले खेल आफ्नो पक्षमा सेवलाई ३–२ को रोमाञ्चक जित दिलाए ।

अन्तिम सेटमा सेवले हाफअघि ८–७ को अग्रता बनाएको थियो । त्यसपछि पश्चमाञ्चलले एक अंकमात्रै जोड्न सक्दा सेवका बालाले उच्च सर्भिस गरिन् ।