काठमाडौं (हाम्रो खेलकुद)– जनता बैंकले नेपाली खेलकुदको अर्को अवार्डका लागि प्रायोजन गरेको छ । नेपाल भलिबल संघले आयोजना हरेक वर्ष आयोजना गर्ने अवार्डअन्तर्गत वर्षको उत्कृष्ट महिला र पुरुष टोली पुरस्कारका लागि प्रायोजन गरेको छ । संघले अर्को साता एनभिए अवार्ड आयोजना गर्दैछ ।

जनता बैंकका नायव प्रमुख कार्यकारी अजय मिश्र र भलिबल संघका अध्यक्ष मनोरञ्जन रमण शर्माले सम्झौता पत्रमा हस्ताक्षर गरेका छन् । सम्झौता अनुसार हरेक वर्ष बैंकले संघलाई २ लाख रुपैयाँ उपलब्ध गराउनेछ संघका महासचिव जितेन्द्रबहादुर चन्दले जानकारी दिए ।

संघ र बैंकबीच अवार्डका लागि ५ वर्ष प्रायोजन गर्ने सम्झौता भएको छ ।
जनता बैंकले यसअघि गत महिना नेपाल राष्ट्रिय तथा अन्तर्राष्ट्रिय खेलाडी संघको वर्षको उत्कृष्ट खेलाडी पुरस्कार अन्तर्गत वर्षका सर्वोत्कृष्ट महिला र पुरुष खेलाडीका लागि प्रायोजन गरेको थियो ।

जनता बैकका नायब प्रमुख कार्यकारी मिश्रले नेपालको राष्ट्रिय खेल भलिबलका खेलाडीको हौसला बढाउनका लागि सहयोग गर्न पाउँदा खुसी लागेको उल्लेख गरेको संघका महासचिव चन्दले बताए ।

महासचिव चन्दले संघका तर्फबाट बैंकलाई धन्यवाद दिदै आउने दिनमा अन्य काममा पनि सहकार्य हुनेमा विश्वास व्यक्त गरे ।