काठमाडौं (हाम्रो खेलकुद)– महिला स्वास्थ्य तथा सशक्तिकरणबारे जनचेतना जगाउने उद्देश्यका साथ हरेक वर्ष आयोजना हुने पिंकाथन नेपालको तेस्रो संस्करण फागुनमा हुने भएको छ ।

फागुन ११ गते काठमाडौंमा हुने पिंकाथन दौडमा ५ हजार भन्दा बढी महिलाको सहभागिता रहने शुक्रबार राजधानीमा आयोजित पत्रकार सम्मेलनमा आयोजकले अनुमान गरेका छन् । प्रतियोगिताको आयोजना स्थल टुंगो लाग्न बाँकी रहेको बताइएको छ ।

नेपाल प्रहरीको महाराजगन्जस्थित तालिम केन्द्र वा पुल्चोक इन्जिनियरिङ कलेजबाट दौड सुरु हुने सम्भावना रहेको जनाइएको छ । पिंकाथनमा चार विधा हाफ म्याराथन (२१ किलोमिटर), १०, ५ र ३ किलोमिटर दौडमा प्रतिस्पर्धा हुनेछ ।

हाफ म्याराथनको विजेताले ५१ हजार, दोस्रोले ३१ र तेस्रो खेलाडीले ३१ हजार रुपैयाँ प्राप्त गर्नेछिन् । त्यस्तै १० किलोमिटर दौडको विजेताले ३१ हजार, दोस्रोले २१ र तेस्रो खेलाडीले ११ हजार रुपैयाँ पाउनेछिन् । ५ किलोमिटरको विजेताले ११ हजार रुपैयाँ जित्नेछिन् ।

भारतीय कलाकार एवंम दक्षिण एसियाली खेलकुदका पौडीका रजत पदक विजेता मिलिन्द सोमनले महिला सशक्तिकरण तथा स्तन क्यान्सरसम्बन्धी जनचेतना जगाउने अभियानका साथ भारतको मुम्बईबाट पिंकाथन सात बर्ष अघि सुरु गरेका थिए ।

पिंकाथन भारतका ८ सहर र नेपालको काठमाडौंमा आयोजना हुँदै आएको छ । पिंकाथनको पहिलो संस्करण दशरथ रंगशाला र दोस्रो प्रहरी तालिम केन्द्रबाट सुरु भएको थियो ।