काठमाडौं (हाम्रो खेलकुद) – नेपाल आर्मीकी लुमन्ती श्रेष्ठ र क्योकुसिनकी शिवानी श्रेष्ठ दोस्रो वीर गणेशमान सिंह स्मृति राष्ट्रिय खुला किक बक्सिङ प्रतियोगिताको फाइनलमा प्रवेश गरेका छन् ।

दोश्रो वीर गणेशमान सिंह स्मृति राष्ट्रिय खुला किक बक्सिङमा प्रतिस्पर्धा गर्दै खेलाडी ।

उनीहरुले महिला ६० केजी तौल समूहमा आ–आफ्नो प्रतिद्धन्द्धीलाई शुक्रबार पराजित गर्दै फाइनलमा प्रवेश गरेका हुन् । ललितपुरको चापागाउँमा भइरहेको प्रतियोगितामा लुमन्तीले आयोजक ललितपुर जिल्ला किक बक्सिङ संघकी कल्पना घर्ती तथा शिवानीले एपीएफकी पूजा लामालाई सेमिफाइनलमा पराजित गरे ।

महिला खुलामा आर्मीकी मन्जु विकले भाटभटेनीकी जेदिशा सिजापति तथा आर्मीकी विन्दु पुन मगरले आयोजककी मनीषा लामालाई हराउदै फाइनलमा पुगे ।

महिला ५५ केजीमा एपीएफकी अन्जली श्रेष्ठले नरहरिपुरकी राधा मानन्धर तथा आयोजककी समिता राईले आयोजककै रोशना राईलाई पाखा लगाउदै फाइनलमा स्थान सुरक्षित गरे । पुरुष ७० केजीमा सो क्योकुसिनका प्रदीप तामाङले आर्मीका शिवजी सिलवाल तथा एपीएफका वीरेन्द्रसिंह खत्रीले आईकेकेएफका प्रवीण मेचेलाई पन्छ्याउदै फाइनल यात्रा तय गरे ।

पुरुष खुलामा आयोजकका विनय घिमिरे, आर्मीका किरणसिंह साउद र चित्रसिंह ठकुरी तथा क्योकुसिन काइका दिपेश र्सूयंवंशी सेमिफाइनलमा पुगे । पुरुष ६० केजीमा आयोजकका राजन पाइजा, शंखमूलका योगेश थिङ, आर्मीका राजेश चौधरी र आयोजकका प्रकाश विष्ट सेमिफाइनलमा प्रवेश गरे ।