पोखरा (हाम्रो खेलकुद) – पोखरामा आइतबारबाट सुरु हुने चौथो संस्करणको राष्ट्रिय पुरुष क्लब लिग भलिबल प्रतियोगिताको सम्पूर्ण तयारी पुरा भएको छ ।

नेपाल भलिबल संघको समन्वयमा पोखरामा आयोजना हुन लागेको प्रतियोगिताको सम्पूर्ण तयारी पुरा भएको संघका बरिष्ठ उपाध्यक्ष एवम् कास्की जिल्ला खेलकुद बिकास समितीका अध्यक्ष याम गुरुङले जानकारी गराए ।

प्रतियोगितामा चौथो एनभिए राष्ट्रिय च्याम्पियनसिपमा सहभागी १२ टिममध्ये उत्कृष्ट ८ टोलीले प्रतिस्पर्धा गर्दैछन् । राउन्ड रोविन लिगको आधारमा हुने प्रतियोगिताका सबै खेलहरु पोखरा रंगशालास्थित भलिबल कोर्टमा ७ पुससम्म हुनेछ ।

प्रतियोगिताको उद्घाटन खेलमा विभागीय नेपाल एपिएफ क्लबले काठमाडौंको नयाँ बजार युवा क्लबसँग प्रतिस्पर्धा गर्नेछ । प्रतियोगितामा तीन विभागीय टोली आर्मी, पुलिस र एपिएफसँगै बुटवलको मणिमुकुन्द भलिबल क्लब, जावलाखेल भलिबल प्रशिक्षण केन्द्र, ढोरपाटन क्लब, हेल्प नेपाल स्पोर्टस् क्लब र नयाँबजार युवा क्लब रहेका छन् ।

प्रतियोगिताको विजेताले २ लाख रुपैयाँ प्राप्त गर्नेछ । दोस्रो हुने टोलीले १ लाख रुपैयाँ पाउनेछ । तेस्रो र चौथो हुनेले क्रमश: ५० र २५ हजार रूपैयाँ प्राप्त गर्नेछन् । व्यक्तिगत विधातर्फ उत्कृष्ट लिबेरो, उत्कृष्ट सर्भर, उत्कृष्ट ब्लकर, उत्कृष्ट लिफ्टर, उत्कृष्ट स्पाइकर र प्रशिक्षकले जनही ५–५ हजार रूपैयाँ पाउनेछन् ।