काठमाडौं (हाम्रो खेलकुद)– थाइल्यान्डका कुनलाभत भिटिडसर्न र चनानचिडा जुचारोयन योनेक्स सनराइज नेपाल इन्टरनेसनल ब्याडमिन्टन सिरिजमा च्याम्पियन बनेका छन् । कुनलाभत पुरुष एकलमा र चनानचिडा महिला एकलमा च्याम्पियन बनेकी हुन् ।

हल्चोकस्थित सशस्त्र प्रहरी बलको कभर्डहलमा शनिबार भएको पुरुष एकलको फाइनलमा कुनलाभतले मलेसियाका टिक झि सुलाई २–१ को सेटमा पराजित गर्दै च्याम्पियन बनेका हुन् । निकै नै प्रतिस्पर्धात्मक बनेको खेलको पहिलो सेटमा कुनलाभत २०–२२ ले पछि परेका थिए ।

तर, त्यसपछिको दुवै सेटमा कुनलाभतले उत्कृष्ट पुनरागमन गर्दै जित निकाले । दोस्रो सेटमा कुनलाभतले २२–२० को संघर्षपूर्ण जित निकाल्दा तेस्रो सेटमा २१–९ को सहज जित निकाल्न सफल भए ।

महिला एकलमा थाइल्यान्डकी चनानचिडा जुचारोयनले म्यानमारकी थित तार थुजारलाई २–१ को सेटमा पराजित गर्दै च्यामिपयन बनिन् । पहिलो सेटमा २१–१८ को जित निकालेकी चिनानचिडाले दोस्रो सेट भने १०–२१ ले गुमाएकी थिइन् । तर, निर्णायक सेटमा चिनानचिडाले २१–१७ को जित निकालिन् ।

पुरुष डबल्समा थाइल्यान्डका सुपाक जोमको र वाचिरवित सोतहोनको जोडी आफ्नै देशका ऋत सारापाट र पनाचाई वरसाकतायानको जोडीलाई २१–११ र २१–१५ ले पराजित गर्दै च्याम्पियन बन्यो । महिला डबल्समा भारतकी अर्पना बलान र श्रुतिकी जोडीले श्रीलंकाकी थिलिनी प्रमोदिका र कभिदि श्रीमाननागेकी जोडीमाथि २१–१६ र २१–१३ को जित निकाल्दै च्यामिपयन बन्यो ।

मक्स डबल्समा थाइल्यान्डका सुपाक जोमको र सुपिससाराको जोडीले आफ्नै देशकी पनाचाई वरसाकतायान र पिचायानिनको जोडीलाई १९–२१, २१–१५ र २१–१४ ले पराजित गर्दै च्याम्पियन बन्यो । नेपाल ब्याडमिन्टन संघको आयोजनामा गत मंगलबारबाट शुरु भएको प्रतियोगितामा नेपालसहित २० देशका खेलाडीले प्रतिस्पर्धा गरेका थिए ।