काठमाडौं (हाम्रो खेलकुद)– योनेक्स सनराईज नेपाल इन्टरनेशनल ब्याडमिन्टन सिरिजमा नेपाली खेलाडीको चुनौती समाप्त भएको छ । हल्चोकस्थित सशस्त्र प्रहरी बल (एपीएफ) को कभर्डहलमा बिहिबार भएको खेलमा नेपाली खेलाडी पुरुष एकल, मिक्स डबल्स, पुरुष डबल्स र महिला डबल्समा पराजित भएसँगै सिरिजमा नेपालको चुनौती समाप्त भएको हो ।

पुरुष एकलको क्वाटरफाइनलमा नेपालका शीर्ष वरीयताका रत्नजित तामाङ भारतका कौशल धर्ममेरसँग २–१ को सेटमा पराजित भए । पहिलो सेटमा २१–१४ को हार बेहोरेको रत्नजितले प्रतिस्पर्धात्मक बनेको दोस्रो सेटमा २४–२२ को जित निकाल्दै खेललाई १–१ को बराबरीमा ल्याएका थिए । तर, सेटमा रत्नजित भारतीय खेलाडीसामु निरिह हुदा २१–११ ले नतिजा सुम्पिए ।

पुरुष डबल्समा रत्नजित र दिपेश धामीको जोडी थाइल्यान्डका वारित सारापत र पनाचाई वारासक्तयाननको जोडी सँग २–१ को सेटमा पराजित भयो । पहिलो सेटमा नेपाली जोडी २१–१९ ले पछि परेपनि दोस्रो सेटमा २१–१६ को जित निकालेको थियो । तर, निर्णायक सेटमा रत्नजित र दिपेशको जोडी २१–१४ ले पराजित भयो ।

मिक्स डबल्समा दिपेश र शोभा गौचनको जोडी सिंगापुरका ड्यानी बावाक्रिसनान्ता र तान वेइ हानको जोडीसँग २१–११ र २१–१० को सोझो सेटमा पराजित भयो ।

विजित थापामगर र पुजा श्रेष्ठको जोडी थाइल्यान्डका पनाचाई वारासक्तयानन र पिचायानिन वोङ्चाको जोडीसँग २४–२२ र २१–१४ ले पराजित भयो । विकास श्रेष्ठ र सीता राईको जोडी भारतका राजु रेहन र एनिज कोसारको जोडीसँग २१–१६ र २१–८ को सहज सेटमा पराजित भयो ।

महिला डबल्समा जेसिका गुरुङ र सुनैना मुखियाको जोडी माल्दिभ्सकी अमिनाथ नाहिवा अब्दुल र फाथिमाथ नावाहा अब्दुलकी जोडीसँग २१–१२ र २१–११ ले पराजित भयो । अमिता गिरी रसिला महर्जनको जोडीले म्यानमारका खेलाडीलाई वाक ओभर दियो ।