काठमाडौं(हाम्रो खेलकुद)- विभागीय नेपाल एपीएफ क्लबका टंक अवस्थी र विजय थापाको जोडी राजधानीमा जारी ओप्स टु ‘ए’ साइड पुरुष भलिबल प्रतियोगिताको क्वाटरफाइनलमा प्रवेश गरेका छन् ।

नयाँ बसपार्कस्थित ढोरपाटन क्लबको खेल मैदानमा बिहिबार भएको प्रि–क्वाटरफाइनल खेलमा टंक र विजयको जोडीले बुढानिलकन्ठ भलिबल क्लबका सन्जय बुढाथोकी र विजय बस्नेतको जोडीलाई २–१ को सेटमा पराजित गर्दै अन्तिम आठमा पुग्न सफल भएका हुन् ।

टंक र विजयले पहिलो सेटमा २१–१४ को सहज जित निकालेपनि दोस्रो सेट ९–२१ ले गुमाएको थियो । तर, तेस्रो सेटमा २१–११ को जित निकाल्न सफल भयो । बिहिबारै भएको अर्काे खेलमा ढोरपाटन क्लबमा मनवीर छन्त्याल र सोभित ानाको जोडीले गीतान्जली कलेजका मनिस मल्ल र अमृत केसीको जोडीलाई २–० को सोझो सेटमा पराजित गर्दै क्वाटरफाइनलमा स्थान बनाए ।

मनवीर र सोभितको जोडीले २१–१५ र २१–१२ को सहज जित निकाल्यो । यस्तै आर्मीका दिल सुनार र प्रकाश थापाको जोडी र मिडल्यान्ड स्कुलका होम पुन र कुन्दन शाहीको जोडीले पनि क्वाटरफाइनलमा स्थान बनाए ।

दिल र प्रकाशको जोडीले नेपाल छन्त्याल संघका इन्द्र छन्त्याल र खिम छन्त्यालको जोडीलाई २१–१७ र २१–१४ को सेटमा तथा होम र कुन्दनको जोडीले सन्तोष मगर र लेखनाथ श्रेष्ठको जोडीलाई २१–१६ र २१–४ को सोझो सेटमा पराजित गर्दै अन्तिमा आठमा पुग्न सफल भए । बाँकी चार प्रि–क्वाटरफाइनल र क्वाटरफाइनलका खेल शुक्रबार हुने आयोजक ढोरपाटन क्लबले जनाएको छ ।

प्राविधिक कारणले महिलातर्फको खेल आयोजना गराउन नसकिएको ढोरपाटन क्लबका अध्यक्ष मनवीर छन्त्यालले जानकारी गराए । अर्गानाइजेसन अफ प्राइभेट स्कुल (ओप्स) को मुख्य प्रायोजनमा ढोरपाटन क्लबको आयोजनामा भएको प्रतियोगितामा ३२ टोलीको सहभागिता रहेको छ ।

नकआउटका आधारमा भएको प्रतियोगिता १३ असोजसम्म चल्नेछ । प्रतियोगिताको पुरुषतर्फको विजेताले ४० हजार रुपैया प्राप्त गर्नेछ । दोस्रो हुनेले २० हजार तथा तेस्रो हुनेले ५ हजार प्राप्त गर्ने आयोजकले जनाएको छ । टिकट काटेर खेल हेर्न आउने एक उत्कृष्ट दर्शकले एक थान युएम मोटरसाइकल प्राप्त गर्नेछ ।