काठमाडौं(हाम्रो खेलकुद)- विभागीय नेपाल एपीएफ क्लब र नेपाल छन्त्याल संघले राजधानीमा आजबाट शुरु भएको ओप्स टु ‘ए’ साइड पुरुष तथा महिला बलिभलमा विजयी शुरुवात गरेका छन् । नयाँ बसपार्कस्थित ढोरपाटन क्लबको खेल मैदानमा बुधबार भएको पहिलो खेलमा एपीएफले मिठि खोला गाउपालिका बाग्लुङलाई ३–१ को सेटमा पराजित गर्दै विजयी शुरुवात गरेको हो ।

एपीएफका टंक अवस्थी र विजय थापाको जोडीले मिठिखोलाका ओम प्रकाश जिसी र सुर्य छन्त्यालको जोडीलाई २१–१६, १५–२१ र २२–२० ले पराजित ग¥यो । बुधबारै भएको अर्काे खेलमा नेपाल छन्त्याल संघले थ्री स्टार एकेडेमीमाथि २–० को सहज जित निकाल्दै दोस्रो चरणमा पुग्न सफल भयो ।

छन्त्यालका महेन्द्र छन्त्याल र देवेन्द्र श्रीषको जोडीले थ्री स्टारका विकास गुरुङ र विशाल गुरुङको जोडीलाई २१–१२ र २१–१५ को जित निकाल्न सफल भयो । यस्तै बुढानिलकन्ठले काभ्रे जिल्ला भलिबल संघलाई २१–१६, १८–२१ र २१–६ ले पराजित गर्दै दोस्रो चरणमा पुग्न सफल भए । मिडलयान्ड स्कुलले न्युटन स्कुलमाथि २१–१८ र २१–१० को सहज जित निकाल्यो ।

अर्गानाइजेसन अफ प्राइभेट स्कुल (ओप्स) को मुख्य प्रायोजनमा ढोरपाटन क्लबको आयोजनामा भएको प्रतियोगितामा ३२ टोलीको सहभागिता रहेको छ । नकआउटका आधारमा भएको प्रतियोगिता १३ असोजसम्म चल्नेछ । महिलातर्फ बिहिबार मात्रै टुंगो लाग्ने क्लबले जनाएको छ ।

प्रतियोगिताको पुरुषतर्फको विजेताले ४० हजार रुपैया प्राप्त गर्नेछ । दोस्रो हुनेले २० हजार तथा तेस्रो हुनेले ५ हजार प्राप्त गर्ने आयोजकले जनाएको छ । महिलातर्फको विजेताले २० हजार, उपविजेताले १० हजार र तेस्रो हुनेले ५ हजार पाउनेछ । टिकट काटेर खेल हेर्न आउने एक उत्कृष्ट दर्शकले एक थान युएम मोटरसाइकल प्राप्त गर्नेछ ।