काठमाडौं (हाम्रो खेलकुद)-गन्डकी प्रदेशले राजधानीमा जारी पाँचौ ढोरपाटन राष्ट्रिय खुला पुरुष भलिबल प्रतियोगितामा दोहारो जित निकालेको छ । नयाँ बसपार्कस्थित ढोरपाटन क्लबको खेल मैदानमा सोमबार भएको गन्डकीले धादिङ र चितवन टाइगरलाई समान ३–० को सेटमा पराजत गर्दै दोहोरो जित निकालेको छ ।

पहिलो खेलमा धादिङलाई २५–१९, २५–१९ र २५–१४ ले निराश पारेको गन्डकीले अर्को खेलमा चितवन टाइगरलाई २५–२१, २५–१६ र २५–१६ को सोझो सेटमा हरायो । दोहोरो जितसँगै समूह ‘डी’ रहेको गन्डकीले क्वाटरफाइनलमा पुग्ने सम्भावना बलियो बनाएको छ ।

यता गीताञ्जली कलेज समूह ‘ए’ को विजेताको रुपमा पाँचौ ढोरपाटन राष्ट्रिय खुला पुरुष भलिबल प्रतियोगिताको क्वाटरफाइनलमा प्रवेश गरेको छ । लिगको अन्तिम खेलमा सफलता हात पार्दै तीन खेलबाट ९ अंक बनाउँदै समूह ‘ए’ को विजेता बनेको हो ।

गीताञ्जलीले ढोरपाटन ‘ए’ लाई २६–२४, २६–२४ र २५–१८ को सोझो सेटमा हरायो । सोमबार नै भएका अन्य खेलमा ग्ल्यासियर र बुढानिलकन्ठले सफलता हात पारे । बुढानीलकण्ठले नेपाल छन्त्याल संघलाई २५–१८, २५–२३ र २५–१९ को सोझो सेटमा पराजित ग¥यो ।

ग्ल्यासियरले सूर्योदय कलेजलाई २५–१२, २५–१८ र २५–१४ ले हरायो । यति ब्रुअरी प्रालिको उत्पादन एम–१५० इनर्जि ड्रिङ्सको मुख्य प्रायोजनमा संचालित पाँचौ ढोरपाटन खुला पुरुष भलिबल प्रतियोगितामा १६ टोलीले सहभागिता जनाएका छन् ।

असोज ६ गतेसम्म हुुने प्रतियोगिताका विजेताले १ लाख, उपविजेताले ६० हजार र तेश्रो हुने टोलीले ३५ हजार नगद पुरस्कार प्राप्त गर्ने छन् । प्रतियोगिताको उत्कृष्ट खेलाडीले एक थान मोटरसाइकल पाउने छन् ।