काठमाडौं (हाम्रो खेलकुद)- विभागीय नेपाल एपीएफ क्लब र थ्री स्टार एकेडेमी पाँचौं ढोरपाटन एम १५० खुल्ला पुरुष भलिबल प्रतियोगिताको क्वाटरफाइनलमा प्रवेश गरेका छन् । एपीएफ समूह ‘बी’ बाट तथा थ्री स्टार समूह ‘सी’ बाट लगातार दोस्रो जित निकाल्दै अन्तिम आठमा पुग्न सफल भएका हुन् । दुवै टोलीले समूहमा समान एक खेल खेल्न बाँकी छ ।

नयाँ बसपार्कस्थित ढोरपाटन क्लबको खेल मैदानमा आइतबार भएको खेलमा एपीएफले बाग्लुङको बर्डिगार्ड गाउपालिकालाई ३–१ को सेटमा पराजित ग¥यो । पहिलो सेटमा २५–१९ को सहज जित निकालेको एपीएफले दोस्रो सेट २३–२५ ले गुमाएको थियो । तर, त्यसपछि दुवै सेट एपीएफले २५–१४ र २५–१९ को सहज जित निकाल्यो ।

आइतबारै थ्री स्टार एकेडेमीले बुढानिलकन्ठमाथि ३–१ को जित निकाल्दै लगातार दोस्रो जित निकालेको छ । थ्री स्टारले पहिलो र दोस्रो सेट २५–१५ र २५–१२ ले जितेको थियो । तेस्रो सेट १९–२५ ले गुमाएपनि चौथो सेटमा २५–१छ को सहज जित निकाल्यो ।

अर्काे खेलमा नेपाल छन्त्याल संघले सुर्यदीप कलेजमाथि २५–१२, २५–२१ र २५–२२ को सहज जित निकाल्यो । गीतान्जली कलेजले वेल्कु धादिङमाथि २५–१०, २५–५ र २५–१० को सहज जित निकाल्यो । एन्जल हर्टले बेल्कु धादिङबाट वाकओभर पाए ।

प्रतियोगिता अन्तर्गत सोमबार पाँच खेल हुने आयोजकले जनाएको छ । पहिलो खेलमा गन्डकी प्रदेश र धादिङ, नेपाल छन्त्याल र बुढानिलकन्ठ, ढोरपाटन ‘बी’ र ग्ल्यासियर कलेज र गनडकी प्रदेश र चितवन टाइगरबीच खेल हुनेछ ।