एसियाड ब्याडमिन्टनः नङ्सल प्रि–क्वाटरफाइनलमा पराजित

दीपक न्यौपाने

जकार्ता- नेपाल नम्वर एक नङ्सलदेवी तामाङ इन्डोनेसियाम जारी एसियाड अन्र्तगतको ब्याडमिन्टनको महिला एकलतर्फको प्रि–क्वाटरफाइनलमा पराजित भएकी छन् । शनिबार भएको खेलमा नङ्सल जापानकी यामागुची एकानेसँग २–० का सोझो सेटमा पराजित भएकी हुन् ।

नङ्सलले पहिलो सेट २१–७ र दोस्रो सेट २१–१२ ले गुमाइन् । यस्तै पुरुष डबल्सतर्फ विकास श्रेष्ठ र नवीन श्रेष्ठको जोडी प्रि–क्वाटरफाइनलमा मलेसियाका भिसेम गोव र वि कियोङ टानको जोडीसँग २१–९ र २१–१२ को सेटमा पराजित भए । यससँगै एसियाडमा नेपालको ब्याडमिन्टनको चुनौती समाप्त भएको छ । ब्याडमिन्टनमा पुरुष टिम क्वाटरफाइनलमा पुग्नु नै ठुलो बन्यो ।

पुरुष सिंगल्स्मा रत्नजित तामाङ र बिकास श्रेष्ठ र महिला सिंगल्स्मा नङ्सलदेवी तामाङ र जेसिका गुरुङ, पुरुष डबल्स्मा रत्नजित र दिपेश धामी, महिला डबल्स्मा नङ्सल र जेसिका, मिक्स डबल्स्मा रत्न र नङ्सल तथा दिपेश र जेसिकाको जोडी र पुरुष टिम इभेन्टस र महिला टिम गरी सात इभेन्टस्मा नेपालले प्रतिस्पर्धा गरेको थियो ।