सुरज भण्डारी

अमेरिका –इन्डोनेसियामा अर्को महिना हुने १८ औं एसियाली खेलकुदमा तेक्वान्दोमा पदक जित्ने नेपाली खेलाडीलाई युनिभर्सल युनाइटेड नेपलिज तेक्वान्दो फेडेरेशन (युयुएनटिएफ) ले नगद पुरस्कारको घोषणा गरेको छ ।

विश्वभर रहेका नेपाली तेक्वान्दो पूर्व प्रशिक्षक, प्रशिक्षक एवं खेलाडीहरुको संस्था युयुएनटिएफ एसियाडमा स्वर्ण पदक जित्नेलाई ५ लाख रुपैयाँ दिने घोषणा गरेको छ । रजत पदक जित्नेलाई ३ लाख र कास्य पदक जित्नेलाई १ लाख ५० हजार रुपैयाँ दिने बताएको छ ।

अन्तराष्ट्रिय खेलकुदमा सहभागि खेलाडीको मनोबल उच्च बनाउन मद्दत मिल्ने भएकाले पुरस्कारको घोषणा गरिएको संस्थाका अध्यक्ष सन्तोष प्रधानले बताए । उनले भने, अन्तरािष्ट्रय क्षेत्रमा नेपालको शान बढाउने खेलाडीलाई आगामी दिनमा अझ बढी सहयोग गर्न सकौं भन्ने हाम्रो चाहना छ ।

संस्थाले एसियन खेलकुदको तयारीका लागि हाल दक्षिण कोरियामा रहेका तेक्वान्दो खेलका खेलाडी तथा प्रशिक्षकलाई २ लाख मुल्य बराबरको ट्राकसुट समेत सहयोग गरेको थियो । संस्थाका नेपाल च्याप्टरका पूर्व अध्यक्ष एवं सल्लाहकार नोर्वु लामा मार्फत ट्राकसुट त्यहाँ प्रशिक्षण रहेका खेलाडी तथा प्रशिक्षक गरी २० जनालाई उपलब्ध गराएको संस्थाका महासचिव लभ गोर्खालीले जानकारी दिए ।

एसियाड भदौ २ गते सुरु हुदैछ । एसियाडमा तेक्वान्दोको प्रतिस्पर्धा भदौ ३ गतेबाट सुरु हुनेछ । नेपाली टोलीलाई पूर्व ओलम्पियन खेलाडी दिपक विष्ट, संगिना वैद्य र बद्री घिमिरेको प्रशिक्षण दिइरहेका छन् । प्रधानको नेतृत्वमा रहेको संस्थाको २३ सदस्यीय कार्यसमिति छ ।