काठमाडौं(हाम्रो खेलकुद)– थाइल्यान्डको बैंककमा भएको नर्थ बैंकक थाइल्यान्ड युनिभर्सिटी जुडो च्याम्पियनसिपका पदक विजेतासहितको नेपाली टोलीलाई सोमबार अन्तर्राष्ट्रिय विमानस्थलमा नेपाल जुडो संघले स्वागत गरेको छ ।

अगष्ट ४ र ५ तारिखमा भएको प्रतियोगितामा नेपालले २ स्वर्ण, १ रजत र १ कांस्य पदक जितेको थियो । टोलीलाई जुडो संघका अध्यक्ष दीपकहर्ष वज्राचार्य, महासचिव धर्मकुमार श्रेष्ठ, कोषाध्यक्ष विपिन श्रेष्ठलगायतका पदाधिकारी, खेलाडी, प्रशिक्षकले स्वागत गरेका थिए ।

पुरुष ६६ केजीमुनि इन्द्रबहादुर श्रेष्ठ र महिला ५७ केजीमुनि मनीता श्रेष्ठ प्रधानले नेपाललाई स्वर्ण दिलाएका थिए । १५ प्रतिस्पर्धी सहभागी स्पर्धामा इन्द्रले ४ खेलाडीलाई पराजित गरे । उनले थाइल्यान्डका २ तथा युएई र जापानका खेलाडीलाई हराए ।

११ खेलाडी सहभागी महिला ५७ केजीमुनि मनीताले भियतनाम, सिंगापुर, मलेसिया र थाइल्यान्डका खेलाडीलाई हराइन् । महिला ७८ केजीमुनि पुनम श्रेष्ठले रजत जितिन् । पुनमले लाओसकी खेलाडीलाई पाखा लगाउदै फाइनलमा स्थान सुरक्षित गरेकी थिइन् । फाइनलमा पुनम थाइल्यान्डकी खेलाडीसंग चुकिन् ।

त्यस्तै महिला ५२ केजीमुनि देविका खड्काले कांस्य हात पारिन् । गत संस्करणमा नेपालले उक्त प्रतियोगितामा २ कांस्य जितेको थियो । इन्द्र र उमेश मगरले कांस्य हात पारेका थिए ।
स्वदेश फर्किएको नेपाली जुडो टोली ८ तारिखमा हंगेरी प्रस्थान गर्ने नेपाल जुडो संघका अध्यक्ष दीपकहर्ष श्रेष्ठले जानकारी गराए । ‘हामीले हंगेरीका लागि ८ तारिखलाई भिसा अनुरोध गरेका छौं । भिसा आए टोली सोही दिन हंगेरी प्रस्थान गर्नेछ ।

१० देखि १२ तारिखसम्म हंगेरीमा आयोजना हुने बुढापेस्ट ग्रान्ड प्रिक्स जुडो च्याम्पियनसिपमा सहभागिता जनाउनेछ । अध्यक्ष श्रेष्ठले भने, ‘८ मा नभए ९ तारिखमा टोली हंगेरी प्रस्थान गर्ने र पहिलो दिनको तौल समूहको खेल गुमाउनेछ ।’