काठमाडौं (हाम्रो खेलकुद)– पोखरामा पहिलोपटक प्रथम खुल्ला पुरुष बिच भलिबल प्रतियोगिता हुने भएको छ । कास्की जिल्ला भलिबल संघको आयोजनामा हुने पहिलो संस्करणको खुल्ला पुरुष बिच भलिबल प्रतियोगिताको लागि तीब्र तयारी भैरहेको आयोजक कास्की जिल्ला भलिबल संघले जनाएको छ ।

प्रतियोगिता १ भदौबाट ३ भदौसम्म पोखरा फेवातालको किनार बाराही घाटमा हुनेछ । पोखरालाई खेलकुदमार्फत पर्यटन प्रवद्र्धन गर्न तथा बिच भलिबलका खेलाडी उत्पादनलाई समेत मध्यनजर गर्दै प्रतियोगिता आयोजना गर्न लागिएको संघका अध्यक्ष भिम पराजुलीले जानकारी गराए ।

उनले तीन दिने प्रतियोगितामा २५ भन्दा बढी टिमको सहभागिता रहने समेत बताएको छ । प्रतियोगिताको विजेताले ३० हजार र दोस्रो हुनेले २० हजार प्राप्त गर्ने आयोजकले जनाएको छ ।

१३ औं दक्षिण एसियाली खेलकुद (साग) मा पोखरामै बिच भलिबल हुने भएका कारण यो प्रतियोगिताले तयारीलाई सहयोग हुने नेपाल भलिबल संघका वरिष्ठ उपाध्यक्ष एवम कास्की जिल्ला खेलकुद विकास समितीका अध्यक्ष याम गुरुङले बताए ।
कुल ४ लाख ८५ हजार खर्च लाग्ने प्रतियोगितालाई पश्चिमाञ्चल क्षेत्रिय खेलकुद विकास समिती, कास्की जिल्ला खेलकुद विकास समिती, पश्चिमाञ्चल क्षेत्रिय भलिबल संघ लगायत विभिन्न संघ सस्थाहरुले सहयोग गरेको छ । टिम दर्ताको लागि साउन ३० गते सम्म समय तोकिएको छ ।