थाइल्यान्डमा विमला र संगिता विजयी

काठमाडौं (हाम्रो खेलकुद)-१८औं एसियाली खेलकुदका लागि थाइल्यान्डमा विशेष प्रशिक्षणरत दुई महिला बक्सिङ खेलाडीले त्यहाँ भएको मैत्रीपूर्ण खेलमा जित हासिल गरेका छन् ।

चार मुलुकका टोलीहरु सम्मिलित मैत्रीपूर्ण प्रतियोगिता अन्तर्गत आइतबार भएको खेलमा महिला ५७ केजी तौलसमूहमा संगिता सुनारले लगातार दोस्रो जित हासिल गरेकी छन् । उनले थाइल्याण्ड ‘बी’ टिमकी पुर्नापालाई अंकको आधारमा हराएकी हुन् ।

यसअघि शनिबार उनले थाइल्यान्ड ए टिमकी बुन्याबुचलाई हराएकी थिइन् । आइतबार भएको अर्को खेलमा नेपाली राष्ट्रिय टोलीकी विमला श्रेष्ठले ५१ केजी तौलसमूहमा थाइल्याण्ड ‘बी’ टिमकी निल्लाडालाई अंककै आधारमा हराइन् ।

महिला ६० केजीतर्फ पहिलो खेलमा थाइ राष्ट्रिय टोलीकी खेलाडीलाई हराएकी पुनम रावलले आइतबारको खेलमा थाइल्यान्डकै अनुसारासँग पराजित भइन् ।

आगामी भदौ २ देखि १७ गतेसम्म इण्डोनेशियाको जाकार्तामा हुने १८औं एशियाली खेलकुदको तयारीका लागि नेपाली बक्सिङ टोली पछिल्लो डेढ महिनादेखि थाइल्याण्डमा विशेष प्रशिक्षणरत छ ।