काठमाडौंं (हाम्रो खेलकुद) – ब्राइट फ्युचर माध्यमिक विद्यालयको आयोजनामा ‘प्रथम ब्राइट उपत्यकाव्यापी अन्तर स्कुल छात्रा फुटसल’ प्रतियोगिता हुने भएको छ । प्रतियोगिता मंगलबार र बुधबार दुई दिन ढुङ्गेअड्डास्थित आदर्श फुटसलमा हुनेछ ।

प्रतियोगितामा विभिन्न ९ स्कुलको सहभागिता रहने प्रतियोगिता संयोजक तथा ब्राइट फ्युचरका प्रशिक्षक दीपक वाइवाले मंगलबार आयोजित पत्रकार सम्मेलनमा जानकारी गराए । प्रतियोगितामा सहभागी १२ टिमलाई चार समूहमा विभाजन गरिएको छ ।

राउन्ड रोविन लिगको आधारमा हुने प्रतियोगिताको समूहको शीर्ष टोली सेमिफाइनलमा प्रवेश गर्नेछ । प्रतियोगिताको पहिलो दिन समुह चरणका खेल हुनेछ । दोस्रो दिन सेमिफाइनल, तेस्रो स्थान र फाइनल खेल हुने पुर्व राष्ट्रिय खेलाडी तथा प्रशिक्षक रमेश बुढाथोकीले जानकारी गराए ।

समूह चरणका खेल १५ मिनेटको हुनेछ । सेमिफाइनल, तेस्रो स्थान र फाइनल खेल २० मिनेटको हुने आयोजकले जनाएको छ । प्रतियोगिताको विजेताले ट्रफीसहित मेडल र प्रमाणपत्र प्राप्त गर्नेछ । नगदसहितको प्रतियोगिता राख्दा स्कुलले बाहिरी खेलाडी ल्याउन सक्ने बताउदै नगद पुरस्कार राशि नराखिएको आयोजकले जनाएको छ ।

समूह ‘ए’– ब्राइट फ्युचर ‘ए’, अमर इंग्लिस स्कुल र छहारी शिक्षा सदन
समूह ‘बी’– ब्राइट फ्युचर ‘बी’ महेन्द्र फुलबारी र सेन्ट जेभियर
समूह ‘सी’– ब्राइट फ्युचर ‘सी’, ग्रीन तारा र पाराडाइज रिर्डस ‘ए’
समूह ‘डी’– मंगलदीप, लिटिल बड र पाराडाइज रिर्डस ‘बी’