काठमाडौं (हाम्रो खेलकुद)- दोस्रो ई–प्लानेट अन्तर कलेज फुटसल प्रतियोगता यही बिहीबार र शुक्रबार हुने भएको छ । नेसनल कलेजको आयोजनामा हुने दुई दिने प्रतियोगिता बालुवाटारस्थित ढुकु फुटसल हबमा हुनेछ । प्रतियोगितामा देशभरका ३२ कलेजले सहभागिता जनाउने आयोजकले जनाएको छ ।

सहभागी टोलीलाई ८ समूहमा विभाजन गरिनेछ जसअनुसार प्रतियोगिताका समूह चरणका खेल राउन्ड रोविनको आधारमा र त्यसपछिका खेलहरु नकआउटका आधारमा हुने आयोजकले जानकारी गराएको छ ।

प्रतियोगितामा टेन प्लस टु र ब्याचलर लेभलका विद्यार्थीले सहभागीता जनाउनेछन् । राष्ट्रिय खेलाडी र ‘ए’ डिभिजनका खेलाडीले प्रतियोगिता खेल्न नपाृने आयोजकले जनाएको छ ।

प्रतियोगिताको विजेताले नगद ३५ हजार रुपैयाँसहित कूल ५० हजार रुपैयाँ बराबरको पुरस्कार प्राप्त गर्नछ । दोस्रो हुनेले नगद २० हजार रुपैयाँसहित कूल ३० हजार रुपैयाँ बराबरको पुरस्कार प्राप्त गर्नेछन् । यसका साथै प्रतियोगितामा उत्कृष्ट प्रदर्शन गर्ने एक खेलाडी, उच्च गोलकर्ता तथा उत्कृष्ट गोलकिपरले पनि आकर्षक गिफ्ट ह्याम्पर प्राप्त गर्नेछन् ।

प्रतियोगितालाई एजुकेसन प्लानेट (ई–प्लानेट) प्रालिले मुख्य प्रायोजन गरेको छ । सह–प्रायोजकमा नेपाल एसबीआई बैंक रहेको छ । १६ टोली सहभागी रहेको गत वर्ष आयोजित प्रतियोगिताको उपाधि आयोजक नेसनल कलेजले जितेको थियो । प्रतियोगीतामा सहभागिताका लागि प्रति टिम ६ हजार रूपैयाँ रजिस्ट्रेसन शुल्क बुझाउनुपर्ने छ ।