काठमाडौं (हाम्रो खेलकुद)– ब्राइट फ्युचर माध्यमिक विद्यालयले पहिलो सस्करणको अन्तर स्कुल गोल्डेनगेट फुटसल मेला (च्याम्पियनसिप) को उपाधि जितेको छ । च्यासलस्थित नेशनल स्पोर्टस् सेन्टरमा बिहिबार भएको फाइनलमा साहारा बोर्डिङ स्कुललाई ३–२ ले पराजित गर्दै ब्राइट फ्युचरले उपाधि जितेको हो । ब्राइट फ्युचरका समर्पण आलेमगरले २ गोल गरे । यस्तै दिवस खड्काले एक गोल थपे । साहाराका अनिश केसी र सुन्दर मगरले समान १ गोल गरे ।

कखरा प्रालिको ब्यबस्थापनमा खेलपाटी डटकमले आयोजना गरेको च्याम्पियनसिपको उपाधिसंगै ब्राइट फ्युचरले २० हजार प्राप्त गरेको छ । उपविजेता बनेको साहाराले १० हजार प्राप्त गर्यो । तेस्रो भएको महालक्ष्मी स्कुलले ५ हजार प्राप्त गरेको छ ।

व्यक्तिगत विधातर्फ महालक्ष्मीका विनोद स्याङतान उत्कृष्ट फरवार्ड, सराहाका सन्देश मल्ल उत्कृष्ट मिडफिल्डर, ब्राइट फ्युचरका दिवस खड्का उत्कृष्ट डिफेन्डर, ब्राइट फ्युचरकै पवन चौहान उत्कृष्ट गोलरक्षक र उत्कृष्ट प्रशिक्षकमा साहाराका राजिब लामा चुनिए । दिव्य ज्ञानका दिपेन्द्र लामा सर्वाधिक गोलकर्ता भए । उनले प्रतियोगिताभर ७ गोल गरे ।

विजेता खेलाडीहरुलाई गोल्डेनगेट कलेजका प्रमुख कार्यकाी अधिकृत ९सिइओ रमेश सिलवाल, नेपाल खेलकुद पत्रकार मंचका अध्यक्ष महेश आचार्य, मंचका महासचिव प्रकाश तिमल्सिना, मंचका कार्यसमिति सदस्य सरिता श्रेष्ठ, पुर्व राष्ट्रिय खेलाडी तथा प्रशिक्षक राजुकाजी शाक्य, क्यापिटल मिडिया ग्रुपका प्रबन्ध निर्देशक सुशील राउत, कखरा प्रालिका सीईओ हिम बिक्रम केसी, नेपाली राष्ट्रिय फुटबल टोलीका सदस्य बिक्रम लामा, भोलेन्टियर फाउन्डेसन नेपालका अध्यक्ष ललित शाही र क्यापिटल एफएमका म्यानेजर बसन्त शर्माले पुरस्कृत गरे । च्याम्पियनसिप नकआउट आधारमा भएको च्याम्पियनसिपमा २६ टोलीको सहभागिता रहेको थियो ।