काठमाडौं (हाम्रो खेलकुद) – जारी लक्ष्मणकुमार श्रेष्ठ स्‍मृति पाँचौं राष्ट्रिय इन्डोर आर्चरी प्रतियोगितामा कास्की आर्चरी क्लबकी केशरी आले मगरले स्वर्ण जितेकी छिन् । केशरीले फाइनलमा नेपाल आर्मीकी अइशा तामाङलाई पराजित गरिन् ।

निर्धारित समय ५-५ को बराबरीमा टुंगिएपछी दुवैले १-१ तिर हान्ने मौका प्राप्त गरेका थिए । सो अवसरमा केशरीले १० अंक जोड्दा अइशाले ९ अंक मात्र जोडिन् । यसैगरी आर्मीकै ज्ञानु अवालेले तेस्रो स्थान हांसिल गरिन् ।

त्रिपुरेश्वरस्थित राष्ट्रिय खेलकुद परिषद्को कभर्डहलमा खेलिएको प्रतियोगिताको पुरुषतर्फ रिकर्भमा आर्मीका रोशन नगर्कोटी पहिलो भए भने ट्रेडिसन आर्चरी क्लबका लक्ष्मण पुन दोस्रो र प्रेम विक तेस्रो भए । पुरुष स्ट्यान्डर्डतर्फ आर्मीका तविन गुरुङ पहिलो, ट्रेडिसनका प्रेमकुमार भट्टचन दोस्रो र वेस्ट आर्चरीका नविनवीर बस्नेत तेस्रो भएका हुन् ।

महिला स्ट्यान्डर्डतर्फ भने अर्चना थापा पहिलो, सेलिना गुरुङ दोस्रो र सर्मिला गुरुङ तेस्रो भइन् । तीनै प्रतिस्पर्धी अन्नपूर्ण आर्चरी क्लबका हुन् ।
त्यस्तै पुरुष व्यक्तिगत कम्पाउन्डमा वेस्टका प्रजित अग्रवालले पहिलो स्थान हात पार्दा, राजधानी दैनिकका सनातन मल्ला दोस्रो तथा स्वयम्भु रिक्रियसनका रमेश भट्टचनले तेस्रो स्थानमा चित्त बुझाए ।

पुरुष स्ट्यान्डर्ड टिम इभेन्टतर्फ वेस्टले पहिलो स्थान हात पारेको हो । अन्नपूर्ण दोस्रो स्थान तथा आर्मी तेस्रो स्थान हांसिल गर्न सफल रह्यो । रिकर्भतर्फ भने आर्मी पहिलो, ट्रेडिसन दोस्रो र कास्कीले तेस्रो स्थान हात पार्‍यो ।

दुई दिन लामो प्रतियोगितामा ५५ खेलाडीले ७ विधामा प्रतिस्पर्धा जनाएका थिए ।