काठमाडौं (हाम्रो खेलकुद) – थाइल्यान्डको बैंककमा सुरु भएको थाइल्यान्ड ओपन अन्तर्राष्ट्रिय बक्सिङ प्रतियोगिताको पहिलो दिन ५६ केजी मुनीको तौल समूहमा नेपाली खेलाडी विमल रोका विजयी भएका छन् । विमलले पहिलो चरणको खेलमा स्लोभेनियाका एलेक्स गुजेजमाथि जित हासिल गरको हुन् ।

तस्बिर सौजन्य -एनएसजेएफ

थाइल्यान्ड बक्सिङ संघको आयोजना भएको प्रतियोगितामा शनिबार अन्य दुई खेलाडी खेलाडी दीपक श्रेष्ठ र एकबहादुर घले पराजित भएका छन् । ७५ केजी मुनीको तौल समूहमा दीपक काजकस्तानका अमान काजन्कापोभसँग पराजित भए । त्यस्तै ६० केजि मुनि तर्फ एकबहादुर आयोजक थाइल्यान्ड बि का सोमचाइ वोङ्सुवानसँग हारेका थिए ।

प्रतियोगितामा आइतबार ६९ केजि मुनि बिष्णु प्रसाद घलेले चाइनिज ताइपेका खेलाडीसँग प्रतिस्पर्धा गर्ने छन् । त्यस्तै प्रतियोगितामा अन्य नेपाली खेलाडी भुपेन्द्र थापाले ६४ केजि मुनी, तेज बाहादुर देउवाले ४९ केजी मुनीको तौल समूहमा खेल्नेछन् । ५२ केजी मुनीको तौल समूहमा प्रेम चौधरी भने मेडिकल डिसक्वालिफाइड भएका छन् ।

प्रतियोगितामा नेपाल सहित अन्य ३० देशका ३ सय भन्दा बढी खेलाडिले भाग लिइरहेका छन् । नेपाल बक्सिङ संघको ब्यबस्थापनमा नेपाली टोलीले आसन्न एसियन गेम्सको तयारी त्यहि गर्नेछ । थाइल्यान्डमा झन्डै डेढ महिनाको तयारीपछि नेपाली टोली डन्डोनेसिया प्रस्थान गर्नेछ । इन्डोनेसियाको जाकार्तामा भदौको पहिलो साताबाट १८ औं एसियाली खेलकुद सुरु हुनेछ ।