गौतम विश्व भेट्रान्स टेबल टेनिसका लागि अमेरिका प्रस्थान

काठमाडौं (हाम्रो खेलकुद)– अमेरिकाको लासभेसामा आयोजना हुने विश्व भेट्रान्स टेबलटेनि प्रतियोगितामा नेपाली टेबल टेनिसका मुख्य प्रशिक्षक शंकर गौतमले निर्णायकको भूमिका निर्वाह गर्ने भएका छन् ।

सोमबारबाट सुरु हुने प्रतियोगितामा भाग लिन अखिल नेपाल टेबुल टेनिस संघका महासचिव समेत रहेका गौतम त्यसतर्फ प्रस्थान गरिसकेका छन् ।

असार १० गते सम्म चल्ने प्रतियोगितामा ५ हजार भन्दा बढी खेलाडीको सहभागिता रहने बताइएको छ । प्रतियोगिता प्रत्येक दुई वर्षमा आयोजना हुने गरेको छ ।

यसअघि स्पेनमा भएको संस्करण निर्णायकको भुमिका निर्वाह गरेका गौतमले दक्षिण एसियाली जुनियर टेवलटेनिस प्रतियोगिता, एसियन जुनियर प्रतिायोगिता, विश्व जुनियर टेवलटेनिस प्रतियोगिता, दक्षिण एसियाली खेलकुद, एसियन च्याम्पियनसीप, विश्व टेवलटेनिस प्रतियोगितामा निर्णायकको भूमिका निर्वाह गरिसकेका छन् ।

त्यस्तै उनले यु.एस. ओपन, कमनवेल्थ गेम्स लगायत गरी भारत, पाकिस्तान, बंगलादेश, श्रीलंका, थाइल्याण्ड, जापान, कोरिया, अमेरिका, अष्ट्रिया, स्पेन, लगायतका देशमा अन्तर्राष्ट्रिय निर्णायकको भुमिका निर्वाह गरिसकेका छन् ।