काठमाडौ (हाम्रो खेलकुद)– घरेलु महिला भलिबलमा अपराजित रहँदै आएको विभागीय नेपाल एपीएफ क्लबको अपराजित यात्रामा पूर्णविराम लागेको छ ।त्रिपुरेश्वरस्थित राष्ट्रिय खेलकुद परिषद्को कभर्डहलमा बिहिबार भएको लिग चरणको अन्तिम खेलमा एपिएफको अपराजित यात्रामा शिवम् न्यु डायमण्डले पूर्णविराम लगाएको हो । डायमण्डले एपिएफमाथि ३–१ को जत निकाल्न सफल भयो ।

गत माघमा भएको प्रथम शिवम न्यु डायमण्ड कप भलिबलमा पराजित भएयता एपिएफ विभिन्न ६ प्रतियोगितासम्म अपराजित रहँदै आएको थियो । त्यतिबेला एपिएफ डायमण्डसँग नै पराजित भएको थियो । न्यु डायमण्ड कपपछि एपिएफले मेयर कप, दिदी बहिनी कप, प्रधानमन्त्री कप, आइजीपी कप र एनभिए कप र शेर बहादुर खड्का स्मृति कपसम्म अपराजित रहन सफल भएको थियो ।

नियमित सेटर कृपा अधिकारी टिममा नहुदा कमजोर देखिएको डायमण्डको नयाँ सेटर श्रीना मालीले एपीएफविरुद्धको खेलमा उत्कृष्ट खेल पस्कदा कृपाको अभाव खड्का दिएनन् । डायमण्डले पश्चिमाञ्चलका मन्जु गुरुङ र अरुणा शाहीलाई टिममा समावेश गर्दै टोलीलाई सन्तुलित बनाएको छ ।

राम्रो शुरुवात गरेको डायमण्डले पहिलो र दोस्रो सेट २५–१६ र २५–२० सहजै जित्दै खेललाई आफ्नो पक्षमा पारेको थियो । तेस्रो सेट १७–२५ ले गुमाएपनि चौथो सेटमा २५–१६ को जित निकाल्न सफल भयो । जितका बावजुत डायमण्ड दोस्रो स्थानमा रह्यो ।

समान १२ अंक नै रहेपनि एपिएफ सेटको आधारमा एपीएफ शीर्ष स्थानमा रहन सफल भयो । अब एपीएफले फाइनल प्रवेशका लागि अर्को विभागीय टोली त्रिभुवन आर्मी क्लब र डायमण्डले फाइनल प्रवेशका लागि पुलिससँग खेल्नेछ । डायमण्ड लिगको पहिलो खेलमा पुलिससँग पराजित भएको थियो ।

पुलिस माथि आर्मीको महत्वपूर्ण जित

महिला भलिबलमा कान्छो विभागीय टोली त्रिभुवन आर्मी क्लबले अर्को विभागीय टोली नेपाल पुलिस क्लबमाथि जित निकालेको छ । आर्मीले राजधानीमा जारी चौथो आरबीबी एनभिए राष्ट्रिय महिला क्लब लिग भलिबल च्याम्पियनशिपको समुह चरणको अन्तिम खेलमा पुलिसमाथि ३–२ को जित निकालेको हो ।

महिला भलिबलमा आर्मीले अहिलेसम्म पुलिसमाथि जित हात पार्न सकेको थिएन । आर्मीका प्रशिक्षक कपिल किशोर श्रेष्ठले अहिले नेपालको दोस्रो टिमलाई पराजित गर्न सक्नु बहादुरी रहेको बताए ।

‘नेपालको नम्वर दुई टोलीलाई पराजित गर्न सक्नु आर्मीको बहादुरी हो । पुलिसमाथिको ऐतिहासिक जितले आर्मी अब भलिबलमा कमजोर छैन भन्ने सन्देश दिएको छ ’ प्रशिक्षक श्रेष्ठले भने, ‘अंक गुमाएपछि आफै नर्मस हुने टोलीलाई यो जितसँगै मनोवल उच्च रहेको छ । सेमिफाइनलमा एपीएफसँग प्रतिस्पर्धा गर्नको लागि यो जितले थप हौसला मिलेको छ । एपीएफवरुद्धको खेल पनि राम्रो हुने अपेक्षा छ ।

खेलमा शुरुवाती सेट २५–१५ ले जित्दै पुलिसले अग्रता बनाएको थियो । तर, दोस्रो सेटमा उच्च प्रदर्शन गरेको आर्मीले पुलिसलाई कुनैपनि समय खुलेर खेल्न नदिदा २५–१० ले जित्दै खेल १–१ को बराबरीमा ल्याएका थियो । यो सेटमा आर्मीका मुख्य स्पाइकर निरुता ठगुन्ना, क्वीकर सुनिता खड्काले उच्च प्रदर्शन गरेकी थिइन् । तेस्रो सेट २५–२० ले जितेपछि आर्मीले खेलमा २–१ को अग्रता बनायो ।

चौथो सेटमा चार अंकको अग्रता बनाएर पनि आर्मीले खेल २२–२५ ले गुमाउदा खेल २–२ को बराबरीमा पुगेको थियो । प्रतिस्पर्धात्मक र रोमाञ्चक बनेको पाँचौ तथा निर्णायक सेटको पहिलो हाफमा आर्मीले ८–७ को अग्रता लिदै खेललाई आफ्नो पक्षमा पार्न प्रयास गरेको थियो । तर, त्यसपछि आर्मीले एक अंक जोड्दा पुलिसले लगातार दुई अंक जोडेपछि आर्मी १०–९ ले पछि परेको थियो । निरुताले स्पाइकबाट अंक जोडेपछि खेल फेरि बराबरीमा पुगेको थियो ।

त्यसपछि मनिषा खाँडले ब्लक र निरुताले सर्भिसबाट अंक जोडेपछि आर्मी १३–१० ले अघि रह्यो । निरुताले सर्भिस र जानकी भण्डारीले डबल फल गरेपछि खेल १३–१२ को रोमाञ्चक मोडमा पुगेको थियो । त्यसपछि मनिषाले ब्लकबाट र संगम महतोको स्पाइकबाट आर्मी लगातार दुई अंक जोडेपछि १५–१२ को जित निकाल्दै पुलिसमाथि ऐतिहासिक जित निकाल्न सफल भएको हो ।

जितपछि पनि आर्मी ८ अंकसहित लिगको चौथो स्थानमा रहन सफल भयो । अब आर्मीले फइनल प्रवेशका लागि शुक्रबार महिला भलिबलको सशक्त टोली नेपाल एपीएफ क्लबसँग खेल्नेछ । एपीएफ जारी लिगमा अपराजित एक्लो टोली हो ।

नेपाल भलिबल संघको आयोजना तथा राष्ट्रिय बाणिज्य बैंकको मुख्य प्रायोजनमा सञ्चालन भएको प्रतियोगिता ६ टिमको बीच राउण्ड रोबिन लिगका आधारमा भएको लिगमा शीर्ष चार टोली सेमिफाइनल प्रवेश गर्नेछन् ।

जेठ २६ सम्म सञ्चालन हुने प्रतियोगिताको बिजेता टिमले २ लाख, उपबिजेताले १ लाख, तेश्रोले ५० हजार र चौथो हुनेले २५ हजार नगद प्राप्त गर्नेछन् । प्रतियोगिताको उत्कृष्ट खेलाडीले २५ हजार प्राप्त गर्नेछिन् । त्यस्तै बिधागततर्फ बेष्ट स्पाईकर, सेटर, ब्लकर, सर्भर, डिफेन्टर र बेष्ट कोचले जनहि ५ हजार प्राप्त गर्नेछन् ।