काठमाडौं (हाम्रो खेलकुद)– साविकको उपविजेता शिवम न्यु डायमण्ड एकेडेमी चौथो आरबीबी एनभिए राष्ट्रिय महिला क्लब लिग भलिबल च्याम्पियनसिपको पहिलो खेलमा विभागीय नेपाल पुलिस क्लबसँग पराजित भएको छ । अर्को विभागिय टोली एपिएफले पनि विजयी सुरुवात गरेको छ ।

त्रिपुरेश्वरस्थित राष्ट्रिय खेलकुद परिषदको कभर्डहलमा सोमबारबाट शुरु भएको च्याम्पियनसिपमा डायमण्ड पुलिससँग ३–१ को सेटमा पराजित भएको हो । डायमण्डले पश्चिमाञ्चलकी कप्तान मन्जु गुरुङ र अरुणा शाहीलाई टिममा उतारेपनि जित हात पार्न सकेन । मन्जु र अरुणाले आफ्नो स्वभाविक खेल देखाउन सकेन । पहिलो सेट २५–२१ ले जितेको डायमण्डले त्यसपछिको तीन सेट २५–११, २५–२३ र २५–२१ गुमाउन पुग्यो ।

सोमबारै भएको दोस्रो खेलमा खेलमा पद्मोदय युवा क्लबले जाउलाखेल भलिबल प्रशिक्षण केन्द्रलाई २५–१४, २५–१६ र २५–२२ को सोझो सेटमा हरायो । पहिलो दिनको अन्तिम खेलमा एपिएफले अर्को विभागिय टोली त्रिभुवन आर्मी क्लबलाई २५–१४,२५–२०,२५–१३ को सोझो सेटमा हराएको थियो । राउण्ड रोबिनका आधारमा संचालन भएको खेलमा तीनै विजेता टिमले समान ३/३ अंक जोडे ।

नेपाल भलिबल संघको आयोजना तथा राष्ट्रिय बाणिज्य बैंकको मुख्य प्रायोजनमा संचालन भएको प्रतियोगितामा ६ टिमको सहभागिता रहेको छ । प्रतियोगितामा एपीएफ, शिवम् न्युडायमण्ड, नेपाल पुलिस, नेपाल आर्मी, जाउलाखेल भलिबल प्रशिक्षण केन्द्र र चितवनको पद्मोदय युवा क्लबले प्रतिस्पर्धा गर्दैछन् ।

नेपाल ओलम्पिक कमिटिका अध्यक्ष माननिय सभासद जिवनराम श्रेष्ठले उद्घाटन गरेको प्रतियोगिताको विजेता टिमले २ लाख, उपविजेताले १ लाख, तेश्रोले ५० हजार र चौथो हुनेले २५ हजार नगद प्राप्त गर्नेछन् । प्रतियोगिताको उत्कृष्ट खेलाडीले २५ हजार प्राप्त गर्नेछिन् । त्यस्तै बिधागततर्फ बेष्ट स्पाईकर, सेटर, ब्लकर, सर्भर, डिफेन्टर र बेष्ट कोचले जनही ५ हजार प्राप्त गर्नेछन् । प्रतियोगिता जेष्ठ २६ सम्म संचालन हुनेछ ।