काठमाडांैं (हाम्रो खेलकुद) –आरबीबी एनभिए राष्ट्रिय महिला क्लब लिग भलिबल च्याम्पियनसिपको चौथो संस्करण सोमबार सुरु हुँदैछ । उद्घाटन खेल नेपाल पुलिस क्लब र शिवम् न्यु डायमण्डबीच हुने नेपाल भलिबल संघले जनाएको छ ।

डायमण्डकी महत्वपूर्ण खेलाडी प्रतिभा माली । फाइल तस्बिर।

नेपाल भलिबल संघको आयोजना तथा राष्ट्रिय बाणिज्य बैंकको मुख्य प्रायोजनमा संचालन हुने प्रतियोगितामा ६ टोलीको सहभागिता रहनेछ । प्रतियोगितामा साविक विजेता एपिएफ,शिवम् न्युडायमण्ड,नेपाल पुलिस क्लब, त्रिभुवन आर्मी क्लब, जाउलाखेल भलिबल प्रशिक्षण केन्द्र र चितवनको पद्मोदय युवा क्लबले प्रतिस्पर्धा गर्ने छन् । सबै टोलीले एकअर्कासँग प्रतिस्पर्धा गर्नेछन् ।

नेपाल ओलम्पिक कमिटिका अध्यक्ष जिवनराम श्रेष्ठले उद्घाटन गर्ने प्रतियोगिताको विजेता टिमले २ लाख, दोस्रो टोलीले १ लाख ,तेश्रोले ५० हजार र चौथो हुनेले टोलीले २५ हजार रुपैयाँ प्राप्त गर्नेछ । जेठ २६ गते सम्म चल्ने प्रतियोगिताको सर्वोत्कृष्ट खेलाडीले २५ हजार प्राप्त गर्नेछिन् ।

त्यस्तै बिधागततर्फ उत्कृष्ट स्पाइकर, सेटर, ब्लकर, सर्भर, डिफेन्टर र प्रशिक्षकले जनही ५ हजार रुपैयाँ प्राप्त गर्नेछन् । प्रतियोगिताका लागि आइतबार साँझ प्राविधिक समितिको बैठक बसेको थियो । हाम्रो खेलकुदले प्रतियोगिताको प्रत्यक्ष प्रसारण गर्नेछ ।