बेथानचोक कप भलिबल सुरु

काभ्रे (हाम्रो खेलकुद)– प्रथम बेथानचोक कप आमन्त्रण भलिबल प्रतियोगिताको उद्घाटनमा आयोजक गाँउपालिकाको बी टोली पराजित भएको छ । काभ्रेको बेथानचोक २ स्थित पार्वती बहुमुखी क्याम्पसको कोर्टमा शनिबार भएको खेलमा आयोजक बी न्यू गौखुरेश्वरसँग २–१ ले पराजित भएको हो ।

तस्बिरहरु – विवेक सुवेदी/हाम्रो खेलकुद

अन्य खेलमा खानीखोला गाँउपालिकाका दुवै टोली, बनेपा नगपालिका र बागमती गाँउपालिकाको टोली विजयी भए । खानीखोला बीले मिल्चे तामाङ एकता समाज, खानीखोला एले कुशादेवीलाई, बनेपाले बेथानचोक एलाई र बागमतीले मन्डन देउपुर नगरपालिको टोलीलाई पराजित गरेको छ ।

बेथानचोक गाँउपालिकाको खेलकुद समितिले आयोजना गरेको प्रतियोगितालाई नेपाल भलिबल संघका अध्यक्ष मनोरञ्जन रमण शर्माले उद्घाटन गरेका थिए । उनले भलिबल विकासका लागि संघ गाँउपालिकालाई सहयोग गर्न तयार रहेको बताए ।

गाँउपालिका अध्यक्ष प्रेमबहादुर तिमल्सिनाले गणतन्त्र दिवसको अवसरमा भलिबल आयोजना गरेको र आउने दिनमा पनि खेलकुदका अन्य प्रतियोगिता आयोजना गर्ने बताए । मंगलबारसम्म चल्ने प्रतियोगितामा १३ टोलीको सहभागिता रहेको छ ।