लिवाङ (हाम्रो खेलकुद) – प्रथम सभामुख कप राष्ट्रिय भलिबल प्रतियोगिताको महिलातर्फ एपिएफ र पुरुषतर्फ अर्को विभागिय टोली नेपाल पुलिस क्लब च्याम्पियन बनेका छन् । 

रोल्पाको सदरमुकाम लिवाङमा बुधबार भएको फाइनलमा पुलिसले त्रिभुवन आर्मी क्लबमाथि ३–१ को जित निकाल्दै च्याम्पियन बनेको हो । महिलातर्फको फाइनलमा एपिएफले पुलिसलाई ३–० सोझो सेटमा पराजित गरेको छ ।

पुरुष फाइनलमा पहिलो सेट पुलिसले २५–२१ ले आफ्नो पक्षमा पारेको थियो । दोस्रो सेट आर्मीले २५–१७ ले सहजै आफ्नो पक्षमा पारेपछि खेल १–१ को बराबरमिा पुगेको थियो । रोमाञ्चक र प्रतिस्पर्धात्मक तेस्रो सेट पुलिसले ३०–२८ ले जितेपछि फेरि पुलिस अघि बढेको थियो । चौथो सेटमा भने आर्मी निकै निरिह देखिदा पुलिसले २५–१५ को सहज जित निकाल्यो ।

महिलातर्फ एपिएफले बैशाखमा चौथो साता भएको केएनपी जापान महिला राष्ट्रिय भलिबल प्रतियोगितामा पुलिसलाई नै पराजित गरेर च्याम्पियन बनेको थियो । एकपक्षीय खेलमा एपिएफले पहिलो सेट २५–९ र दोस्रो सेट २५–८ ले जितेको थियो । तेस्रो सेट केही प्रतिस्पर्धात्मक भएपनि एपीएफले २५–२० ले जित्न सफल भयो ।

पुरुषतर्फ पुलिसका कुल बहादुर थापा र महिलातर्फ एपीएफकी सरस्वती चौधरी प्रतियोगिताको उत्कृष्ट खेलाडी घोषित भईन् । उपाधिसँगै महिला र पुरुष दुवैतर्फको विजेताले समान ३ लाख ५० हजारसहित ट्रफी, मेडर र प्रमाणपत्र प्राप्त गरे । यस्तै दोस्रो भएको दुवै टोलीले समान २ लाख प्राप्त गरे ।

बैशाख २९ गतेबाट शुरु भएको प्रतियोगितामा ७ प्रदेश र तीन विभागीय टोलीसहित १० टोलीले लिगकम नकआउटको आधारमा प्रतिस्पर्धा गरेका थिए ।