काठमाडौं (हाम्रो खेलकुद) – स्वर्गीय खेल पत्रकार सुमन भोम्जनको स्मृतिमा स्पोर्टस् क्लाइम्बिङ प्रतियोगिता बुधबार हुने भएको छ । नेपाल क्लाइम्बिङ स्पोर्ट्स एसोसिएसन (एनसिएसए) र पासाङ ल्हामु पर्वतारोहण प्रतिष्ठानको संयुक्त आयोजनामा बुधबार (एक दिने) क्लाइम्बिङ प्रतियोगिता हुने जानकबारी गराएको हो ।

धुम्वाराहीस्थित पासाङ ल्हामु स्पोर्टस् क्लाइम्बिङ सेन्टरमा हुने प्रतियोगितामा लिड क्लाइम्बिङ र टप रोप गरी दुई विधा समावेश गरिएको प्रतियोगिताको सम्पुर्ण तयारी पुरा भएको आयोजकले जनाएको छ । प्रतियोगितामा दुवै विधामा महिला र पुरुष गरि कुल ६० खेलाडीले सहभागिता जनाउने छन् । लिड क्लाइम्बिङमा २५ र टप रोपमा ३५ खेलाडीले प्रतिस्पर्धा गर्ने एनसिएसएका महासचिव मेघराज पौडेलले पत्रकार सम्मेलनबाट जानकारी गराए । आयोजकले यसपटक नेपालको पहिलो महिला सगरमाथा आरोही तथा राष्ट्रिय विभूति पासाङल्हामु शेर्पाले सर्वोच्च शिखर सगरमाथाको सफल आरोहण गरेको २५ औं बर्षको अवसरमा मनाईने ‘२५ औं पासाङ प्रतिष्ठा रजत दिवस’ को सन्दर्भ पारेर प्रतियोगिता गर्न लागेको समेत जनाएको छ ।

लिड क्लाइम्बिङको महिला र पुरुष दुवैतर्फका विजेताले जनही १५ हजार रुपैयाँ पाउनेछन् । त्यस्तै दोस्रोले १० हजार तथा तेस्रो हुनेले ५ हजार रुपैयाँ पाउनेछन् । टप रोलका विजेतालाई नगद पुरस्कारको व्यवस्था गरिएको छैन ।

एनसिएसए र पासाङ ल्हामु प्रतिष्ठानले तीन बर्षअघि भूकम्पमा ज्यान गुमाएका खेलपत्रकार सुमन भोम्जनको स्मृतिमा दोस्रो बर्ष यो प्रतियोगिता आयोजना गर्न लागेको हो । गोरखापत्र दैनिकमा आबद्द सुमनको गत बिस २०७२ वैशाखमा आएको विनाशकारी भूकम्पमा निधन भएको थियो ।