काठमाडौं (हाम्रो खेलकुद) – आइएमईं जेटिआई ग्रान्ड जुनियर ओपन लन टेनिस प्रतियोगिता जेठ पहिलो साता आयोजना हुने भएको छ । आइएमईं फाउन्डेसनको आयोजना तथा नेपाल लन टेनिस एसोसिएसनको सहयोग र जुनियर टेनिस इनिसिएसन (जेटिआईं) को संयोजनमा जुनियर टेनिस प्रतियोगिता जेठ ६ गतेबाट १२ गते सम्म हुने शुक्रबार आयोजित पत्रकार सम्मेलनमा जानकारी दिइयो ।

प्रतियोगिता काठमाडौंस्थित नाउलिङ स्पोर्टस् भिल्ला सुन्दरवस्ती भंगाल र मण्डिखाटार टेनिस क्लबमा हुनेछ । प्रतियोगिताको मुख्य प्रयोजन बनेको आइएमईं फाउन्डेसनले प्रतियोगिताको लागि ३ लाख ५४ हजार उपलब्ध गराउनेछ ।

प्रतियोगितामा ८ वर्षमुनि, ९ वर्षमुनि, १० वर्ष मुनि, १२ वर्षमुनि र १४ वर्षमुनि गरी ५ उमेर समूहमा प्रतिस्पर्धा हुने जेटिआई संयोजक कृष्ण राज घलेले जानकारी दिए । प्रतियोगितामा १ सय ५० भन्दा बढीको सहभागिताको अनुमान आयोजकले गरेको छ । प्रतियोगिताको १४ वर्ष मुनिको विजेताले थाइल्याण्डको हवाई टिकट प्राप्त गर्नेछन् ।

दोस्रो हुनेले ५० प्रतिशत छुटम हवाई टिकट प्राप्त गर्नेछ । तेस्रो हुनेले चन्द्रागिरी केवलकारको टिकट पाउनेछ । यस्तै १२ वर्षको उमेर समूहको विजेताले दिल्लीको टिकट पाउनेछ । १० वर्ष उमेर समुहको विजेताले निशुल्क प्रशिक्षण पाउने आयोजकले जनाएको छ ।