काठमाडौं (हाम्रो खेलकुद)– नेपालको राष्ट्रिय भलिबल टोलीले बंगलादेशमा जारी चौथो एसियन भलिबल कन्फेडेरेसन (एभिसी) सेन्ट्रल जोन सिनियर मेन्स भलिबल च्याम्पियनसिपमा पहिलो जित दर्ता गरेको छ ।

फाइल तस्बिर

आइतबार भएको खेलमा नेपालले माल्दिभ्समाथि ३–० को सोझो सेटमा हराउदै पहिलो जित दर्ता गरेको हो । नेपाल पहिलो खेलमा घरेलु टोली बंगलादेशसँग ३–१ को सेटमा पराजित भएको थियो ।

मिरपुरस्थित इन्डोर स्टेडियममा नेपालले माल्दिभ्सलाई २५–२१, २५–१८ र २५–१५ ले सहजै हरायो । माल्दिभ्समाथिको सहज जितसँगै नेपालले च्याम्पियनसिपमा सेमिफाइनल पुग्ने सम्भावना जीवितै राखेको छ । अब सोमबार बंगलादेश र माल्दिभ्सबीचको खेलले नेपालको सेमिफाइनल नतिजा तय हुने छ ।

बंगलादेशसँग माल्दिभ्स पराजित भएमा नेपाल उपविजेता र बंगलादेश समूह विजेताको रुपमा सेमिफाइनलमा पुग्नेछ । मध्य एसियाका दोस्रो स्तरका टोलीहरुका लागि प्रत्येक बर्ष आयोजना हुदै आएको सेन्ट्रल जोन प्रतियोगिता नेपालका लागि महत्वपुर्ण प्रतियोगिता हो ।

सेन्ट्रल जोन प्रतियोगिताको चौथो संस्करण आयोजना भईरहदा नेपालले पनि चौथो पटक सहभागिता जनाएको हो । यही प्रतियोगितामा नेपालले गतवर्ष कास्य जित्दै ४२ वर्षे भलिबल इतिहासमा ऐतिहासिक पदक हात पारेको थियो ।