काठमाडौं (हाम्रो खेलकुद)– पाँच महिना पछि इन्डोनेसियामा हुने एसियन गेम्सका लागि बक्सिङका १० खेलाडी छनोट भएका छन् ।नेपाल बक्सिङ संघले आयोजना गरेको दुई दिने छनोट प्रतियोगिताको अन्तिम दिन शुक्रबार ३ र अन्य ७ खेलाडी पहिलो दिन बिहिबार छनोट भएका थिए ।

पुरुष ५२ केजी तौल समूहमा आर्मीा प्रेम चौधरीले एपीएफका बिक्रम परियारलाई अंकका आधारमा हराउदै छनोट भए । त्यस्तै ६९ केजी तौल समूहमा आर्मीका बिष्णु प्रसाद घलेले एपीएफकै बिकास बल लामालाई अंकको आधारमा पराजित गदै छनोट चरण पार गरे । महिला ५१ केजी तौल समूहमा आर्मीकै बिमला श्रेष्ठ छनोट भइन् । उनले एपीएफकी माला राईलाई अंकका आधारमा हराईन् ।

बिहिवार छनोट भएका अन्य खेलाडीमा पुरुष ४९ केजी तौल समूहमा आर्मीका तेजवहादुर देउवा, पुरुष ५६ केजी तौल समूहमा आर्मीका बिमल रोका, पुरुष ६० केजीमा आर्मीका एकवहादुर घले, पुरुष ६४ केजीमा नेपाल पुलिसका भुपेन्द्र थापा र ७५ केजीमा आर्मीका दिपक श्रेष्ठ रहेका छन् । त्यस्तै महिला ५७ केजी तौल समूहमा एपीएफकी संगिता सुनार र महिला ६० केजीमा आर्मीकी पुनम रावल रहेका छन् ।

नेपाल बक्सिङ संघका अध्यक्ष राम अवालेले एसियान गेम्सका लागि राष्ट्रिय खेलकुद परिषद्ले तीन महिला र चार पुरुष खेलाडीको कोटा उपलब्ध गराएपनि १० खेलाडी नै सहभागिता गराउने उद्देश्यले १० छनोट गरिएको बताए ।