ललितपुर (हाम्रो खेलकुद)– दोस्रो न्युजेन खुला तेक्वान्दो च्याम्पियनसिपमा चुनदेवी क्लब र न्युजेन क्लब टिम च्याम्पियन बनेका छन् । सात स्वर्ण पदक पदकसहित चुनदेवी ग्योरोगीतर्फ टिम च्याम्पियन बन्दा ४ स्वर्णसहित ढल्कु डोजाङ दोस्रो र ३ स्वर्ण पदकसहित गोदावरी फिटनेस तेस्रो भएको छ ।

पुम्सेतर्फको टिम च्याम्पियन न्युजेनका खेलाडीका साथ अन्य ।

पुम्सेतर्फ १३ स्वर्ण पदक जित्दै न्युजेन टिम च्याम्पियन बनेको छ । पुम्सेमा ७ स्वर्णका साथ न्यू गोल्ड दोस्रो र ४ स्वर्ण पदकसहित ब्लू बर्ड स्कुल तेस्रो भएको छ । प्रतियोगिताको दोस्रो तथा अन्तिम दिन बिहीबार च्याम्पियनसिपको जुनियर पुम्से ह्वाइट बेल्टमा काव्या चन्दले स्वर्ण पदक जितिन्  । न्युजेनका मानस आचार्यले रजत तथा ह्याप्पी होमका सुशिला पुन मगर सुप्रिम स्कुलका उज्जव पुनले कास्य पदक जिते ।

जुनियर ब्लाक बेल्ट पुम्सेमा न्युजेनका गायोङ सिनले स्वर्ण, विकास महर्जनले रजत तथा न्युजेनका सुजन गुरुङ र शंखमुलका मनीष श्रेष्ठले संयुक्त रुपमा कास्य पदक जिते । जुनियर यल्लो देखि ग्रिन बेल्टमा सुप्रिमकी तारा वाइवाले स्वर्ण, सिन्धुपाल्चोक रितेश श्रेष्ठले रजत तथा न्यू गोल्डका सृजन मगर र सिन्धुपाल्चोकका दीपेश डंगोलले कास्य पदक जिते ।

ग्योरोगीतर्फको छात्रा ४५ केजी मुनिको तौल समूहमा नार्गजुनकी सुस्मिता तामाङ पहिलो भइन् । न्युजेनकी समृद्धि आचार्य दोस्रो भएको उक्त तौल समूहमा ब्लूबर्डकी सारोन थापामगरले तेस्रो स्थान प्राप्त गरिन् । क्याडेट ब्वाइज २५ केजी मुनिको तौल समूहमा न्युजेनका सामुयल धिमालले स्वर्ण, सिन्धुपाल्चोका सुजितकुमारले रजत तथा चुनदेवीका मिलन लामा र जिरीका सन्जित राईले संयुक्त रुपमा कास्य पदक जिते ।

न्युजेन तेक्वान्दो सेन्टरको आयोजनामा दुई दिन सम्म चलेको प्रतियोगितामा २० जिल्लाका ६ सय बढी खेलाडीको सहभागिता रहेको थियो । न्युजेनका निर्देशक सिन चोलोवान, न्युजेनका अध्यक्ष प्रविण थापालगायतले विजेता खेलाडीलाई पुरस्कृत गरे । समापनमा तेक्वान्दोका राष्ट्रिय खेलाडी यानकुमारी चौलागाई, ज्ञानी चुनारा र ज्ञानेन्द्र हमाललाई सम्मान गरिएको थियो । सम्मानित तीन खेलाडी एसियाली खेलकुदका लागि छनोट भएका छन् ।