काठमाडौं (हाम्रो खेलकुद)– राष्ट्रिय खेलकुद परिषद् (राखेप) ले प्रदेश नं ५ (साविक मध्यपश्चिमाञ्चल क्षेत्रिय खेलकुद विकास समिति) मा अर्को वर्ष आयोजना हुने भनिएको आठौं राष्ट्रिय खेलकुदको मिति तय गरेको छ ।

नव नियुक्त युवा तथा खेलकुद मन्त्री जगतबहादुर सुनार (विश्वकर्मा) को अध्यक्षतामा सातदोबाटोमा बुधबार बसेको बोर्डको १ सय नवौं बैठकले आठौं राष्ट्रिय खेलकुद २०७५ मंसिर २१ देखि २८ गते सम्म सञ्चालन गर्ने तय गरेको छ ।

राखेपका अध्यक्ष समेत रहेका सुनार मन्त्री बनेयता राखेपको यो पहिलो बैठक हो । मंसिर मा आठौं आयोजना गर्ने भनिएपनि यसअघि मिति भने तय भएको थिएन । गत वर्ष पूर्वाञ्चलमा सम्पन्न सातौं राष्ट्रिय खेलकुदको समापनका दौरान मध्यपश्चिमलाई आठौं आयोजनाको जिम्मेवारी तोकिएको थियो ।

मध्यपश्चिमाञ्चल खेलकुद विकास समितिका अध्यक्ष भीम ओलीले आठौं राष्ट्रिय खेलकदुलाई लक्षित गर्दै भौतिक पूर्वाधार निर्माणको काम तीब्रगतिमा अघि बढेकोले तोकिएकै समय भित्र प्रतियोगिता सक्ने विश्वास व्यक्त गरे । ओलीका अनुसार नेपालगन्ज रंगशाला, मध्यपश्चिमाञ्चल कार्यालयकै हाता भित्र पौडी पोखरी, भारोत्तोलन एकेडेमीलगायतका पूर्वाधार निर्माणको काम अघि बढेको बताए ।