काठमाडौं (हाम्रो खेलकुद) – एसियाली खेलकुदको प्रचारका लागि ओलम्पिक काउन्सिल अफ एसियाको कार्यक्रम अनुसार एसियन गेम्स फन रन नेपालमा पनि पहिलो पटक आयोजना हुने भएको छ । नेपाल ओलम्पिक कमिटि (एनओसी) को आयोजनमा मंगलबार बिहान एसियन गेम्स फन रन हुने भएको हो ।

यसै बर्ष आयोजना हुने १८ औं संस्करणको एसियन गेम्स आगामी अगस्टमा इन्डोनेसिया हुँदैछ । जार्कर्ता र पालेमबाङमा आयोजना हुने एसियन गेम्समा ४० खेलको ४ सय ६२ स्पर्धामा प्रतिस्पर्धा हुनेछ । उक्त एसियन गेम्सको प्रवर्दन र सामाजिक उत्तरदायित्वको लागि नेपालमा एसियन गेम्स फन रन आयोजना गर्न लागिएको बताइएको छ ।

एसियन गेम्स फन रनमा करिब १४ सयले सहभागिता जनाउने एनओसीले सोमबार आयोजित पत्रकार सम्मेलनमा जानकारी दियो । फन रनमा जो कोहिले पनि भाग लिन पाउने बताइएको छ । सातदोबाटोस्थित एनओसी भवनबाट बिहान ७ बजे सुरु हुने फन रन जावलाखेल, पुल्चोक, गाबहाल हुँदै पुन सातदोबाटो पुगेर सम्पन्न हुनेछ । एसियन गेम्स फन रन ७ किलोमिटरको हुनेछ ।

विभागीय टोलीहरु त्रिभुवन आर्मी क्लब, एपीएफ क्लब र पुलिस क्लबबाट समान एक सय खेलाडी तथा अन्य राष्ट्रिय खेल संघबाट कम्तीमा २० खेलाडीको सहभागिताका लागि आव्हान गरिएको फन रनका संयोजक एनओसी सदस्य अशोक बज्राचार्यले बताए ।

एसियन गेम्स फनको लागि एसियन गेम्स इन्डोनेसिया आयोजक कमिटिका मिडिया तथा पब्लिक रिलेसन उप निर्देशक रत्न इर्सना, ओलम्पिक काउन्सिल अफ एसिया (ओसीए)का मिडिया म्यानेजर जिन् झू जियान र ओसीएका अध्यक्ष अहमद अल फाहदका सचिव विस्सम टार्मनी नेपाल आएका छन् ।

मिडिया मेनेजरले एसियाका विभिन्न राष्ट्रमा फन रनको आयोजना गरिएको उल्लेख गर्दै एसियाली खेलकुदअघि सम्म ३० राष्ट्रमा आयोजना गर्ने लक्ष्य रहेको बताए । पाकिस्तानबाट सुरु भएको फन रनको नेपालमा आयोजना हुने १२ औं संस्करण भएको उनले जानकारी दिए ।