काठमाडौं (हाम्रो खेलकुद) – बंगलादेशमा जारी तेस्रो दक्षिण एसियाली आर्चरी च्याम्पियन्सिपमा नेपालले रिकर्भ मिक्स टिम र कम्पाउण्ड पुरुषतर्फ कास्य पदक जितेको छ ।

ढाकास्थित बिकेएसपी कम्पाउन्ड भित्र भएको खेलमा मिक्सतर्फ नेपालका तिलक पुन मगर र ज्ञानु अवालेको टिमले श्रीलंकालाई पराजित गर्दै कास्य हात पारेको हो । दुवै टिमले दुईदुई सेट जितेर ४–४ अंक को बराबर गरेपछि भएको सुटअफमा नेपाल ५ – ४ ले विजयी भएको थियो । यसअघि भएको टिम एलिमिनेसन राउण्डमा नेपाल बंगलादेशसँग १–३ को सेटमा २–६ अंकले पराजित भएपछि काश्यका लागि श्रीलंकासँग प्रतिस्पर्धा गर्नु परेको हो ।

यसैबीच आजै भएको अर्को खेलमा नेपालका कम्पाउण्ड पुरुष टिमले पनि कास्य जितेको छ । नेपालका होमबहादुर थापा मगर, प्रजित कुमार अग्रवाल र अभिशेक राज प्रधानको टिमले श्रीलंकालाई २०८–१५७ अंकले पराजित गर्दै कास्य जितेको हो । यसअघि आजै भएको एलिमिनेसन राउण्डमा नेपाको कम्पाउण्ड पुरुष टिम भारतसँग २०४–२२४ अंकले पराजित भएपछि तेस्रो स्थानका लागि श्रीलंकासँग प्रतिस्पर्धा गरेको हो ।

यस्तै नेपालको रिकर्भ पुरुष टिम भने तेस्रो स्थानका लागि भएको खेलमा श्रीलंकासँग पराजित भयो । दुवै टिमले दुई दुई सेट जितेर ४–४ अंक को बराबर गरेपछि भएको सुटअफमा नेपाल ४–५ अंकले श्रीलंकासँग पराजित भएको हो । त्यसअघि भएको एलिमिनेसन राउण्डमा नेपालले बंगलादेशसँग लगातार तीन सेट गुमाउदै ०–६ अंकले पराजित भएपछि कास्यका लागि श्रीलंका प्रतिद्वन्दी पाएपनि नेपालले खेल जित्न भने सकेन । नेपालको रिकर्भ पुरुष टिममा प्रेम प्रसाद पुन, तीलक पुन र मिन प्रसाद गौचनले प्रतिस्पर्धा गरेका थिए ।

रिकर्भ महिला टिम पनि तेस्रो स्थानका लागि भएको खेलमा श्रीलंकासँगै पराजित हुन पुग्यो । नेपालकी ज्ञानु अवाले, आइसा तामाङ र तमन्ना क्षेत्रीको टिम श्रीलंकासँग १–३ को सेटमा २–६ अंक ले पराजित भए । त्यसअघि आजै भएको एलिमिनेसन राउण्डमा नेपालको रिकर्भ महिला टिम बंगलादेशसँग ०–३ सेटमा ०–६ अंकले पराजित भएपछि कास्यका लागि श्रीलंकासँग प्रतिस्पर्धा गरेको थियो ।