अमृत चिमरिया
हेटौंडा– प्रदेश नंबर ३ का मुख्यमन्त्री डोरमणी पौडेलले हेटौंडा ६ मा रहेको गौरीटार रं्गशाला अवलोकन गरेका छन् । केन्द्रीय खेलकुद प्रतिष्ठानको रुप रहेको रगंशाला प्रदेश सरकारको प्रमुख प्राथमिकतामा परेकोले मुख्यमन्त्री पौडेलले अवलोकन गरेका हुन् ।

२३ विगहा क्षेत्रफलमा रहेको प्रतिष्ठानमा हाल एक पुरुष छात्रावास निर्माणको अन्तिम चरणमा रहेको छ । फुटबल रंगशाला, क्रिकेट रंगशाला सहित विभिन्न खेल स्थल निर्माण गर्ने योजनासहित ८ वर्षअघि तत्कालिन प्रधानमन्त्री माधवकुमार नेपालले शिलान्यास गरेका थिए ।

नेपालको सरकारपछि पटक पटक सरकारले गठन भएपनि प्रतिष्ठान निर्माण अन्योलमा परेको थियो । अहिले प्रदेश सरकारले प्रतिष्ठान निर्माणलाई उच्च प्राथमिकतामा राखेको बताइएको छ ।

प्रतिष्ठानले मकवानपुरलाई खेल पर्यटन मार्फत सहयोग गर्ने र यो प्रतिष्ठानलाई प्रदेशको गौरबको रुपमा निर्माण गर्न आफु तयार रहेको मुख्यमन्त्री पौडेलले बताए ।

नेपालमा खेल क्षेत्रको विकासको लागि रंगशालाहरु नहुनु प्रमुख समस्याको रुपमा रहेको बेला प्रतिष्ठान निर्माणमा प्रदेश सरकारले महत्वपूर्ण चासो देखाउनु खुसीको विषय भएकोे जिल्ला खेलकुद विकास समिति मकवानपुरका अध्यक्ष माधव तिमल्सिनाले बताए ।

प्रतिष्ठान निर्माणको लागि करिब ३ अर्व लाग्ने अनुमान गरिएको छ । जहाँ फुटबल, भलिबल, क्रिकेट, मार्सलआर्ट, दौड, पौडी, ब्याडमिण्टन, टेनिस लगाएतको दुई दर्जन बढी खेलको लागि पूर्वाधार निर्माण गर्न सकिने बताइएको छ ।