पोखरा (हाम्रो खेलकुद)– नव नियुक्त युवा तथा खेलकुद मन्त्री जगत विश्वकर्माले सरकारले खेलकुद विकासलाई उच्च प्राथमिकतामा राख्ने बताएका छन् । पश्चिमाञ्चल क्षेत्रिय खेलकुद विकास समिति र जिल्ला खेलकुद विकास समिति कास्कीले बुधबार आफ्नो स्वागतमा राखेको कार्यक्रममा विश्वकर्माले सातवटै प्रदेशमा अन्तर्राष्ट्रियस्तरका रंगशाला निर्माण गरिने दोहोराएका छन् ।

मन्त्री विश्वर्माले अर्को वर्ष आयोजना हुने आठौँ राष्ट्रिय खेलकुद प्रतियोगिताका साथै १३औं दक्षिण एसियाली खेलकुद (साग) का लागि आवश्यक पूर्वाधार निर्माणमा जोड दिदै अब बजेटमा खेललाई प्राथमिकतामा राख्नुपर्ने बताए । पोखरासहित प्रदेश नं ४ मा खेल पर्यटनका अत्याधिक सम्भावना रहेको उल्लेख मन्त्री विश्वकर्माले यसको उजागरका लागि सरकार लागि पर्ने बताए ।

पश्चिमाञ्चल क्षेत्रीय खेलकुद विकास समितिका अध्यक्ष खगराज पौडेलले सरकारभन्दा पनि निजी क्षेत्रबाट खेल क्षेत्रका पूर्वाधारमा लगानी भइरहेको जनाउँदै यस क्षेत्रको विकासमा राज्यको लगानीले प्राथमिकता पाउनुपर्ने बताए ।

प्रदेशसभा सदस्य दीपक कोइरालाले खेलाडीलाई खेलेर जीविकोपार्जन गर्ने अवस्था नआउँदासम्म यस क्षेत्रको अपेक्षित विकास हुन नसक्ने बताए । नेपाल पत्रकार महासंघका केन्द्रीय सदस्य रामकृष्ण ज्ञवालीले राज्यबाटै खेल क्षेत्र उपेक्षित भइरहेको बताउँदै राष्ट्रिय पहिचान दिने मार्सल आर्ट जस्ता खेल ओझेलमा परेको बताए ।

कार्यक्रममा जिल्ला बास्केटबल संघ कास्कीका अध्यक्ष ध्वजकुमार गुरुङ, जिल्ला खेलकुद विकास समिति कास्कीका कार्यालय प्रमुख प्रकाश बराललगायतले मन्त्री विश्वकर्माको कार्यकालमा उत्साहजनक रूपमा खेल क्षेत्रको विकास हुने विश्वास व्यक्त गरे ।