बंगलादेशको बिकेएसपी जुडोमा नेपाललाई ४ स्वर्ण

काठमाडौं (हाम्रो खेलकुद)– बंगलादेशमा जारी बिकेएसपी कप जुडो प्रतियोगितामा मंगलबार नेपालले ४ स्वर्ण र १ कास्य पदक पदक जितेको नेपाल जुडो संघले जनाएको छ । महिला ५७ केजीमुनि १२ औं सागकी रजतधारी मनिता श्रेष्ठ प्रधानले स्वर्ण पदक जितिन् । उनले फाइनलमा बंगलादेशकी अरिफा अक्तरलाई पराजित गरेकी थिगइन् ।

पुरुष ६० केजीमा रोशनबहादुर दोङले स्वर्ण पदक जिते । उनले फाइनलमा भारतका अर्विन्दो घोषलाई हराए । ६६ केजीमा स्वर्ण जितेका १२ औं सागका कांस्य विजेता इन्द्रबहादुर श्रेष्ठले बंगलादेशका कायस अहमदलाई पराजित गरे । बाल विकास माविमा अध्ययनरत स्वर्ण विजेता तीनै खेलाडी बन्दी सहायता नियोग (पाम) मा आश्रित छन् ।

मनीता घरेलु प्रतियोगितामा विभागीय टोली त्रिभुवन आर्मी क्लबबाट खेल्दै आएकी छिन् भने बाँकी दुई खेलाडी पामबाटै खेल्छन् । पुरुष ७३ केजीमुनि सुमन श्रेष्ठले स्वर्ण जिते । उनले बंगलादेशकी अकिब हैदर इमोनलाई फाइनलमा हराइन् । महिला ६३ केजी मुनि निर्मला घर्तीले कांस्य पदक जितिन् । प्रतियोगिताको अन्तिम दिन बुधबार ६ नेपाली खेलाडीले प्रतिस्पर्धा गर्नेछन् । नेपालबाट ११ खेलाडी सहभागी छन् ।