काठमाडौं ( हाम्रो खेलकुद) – बर्लिन ओपन अन्तर्राष्ट्रिय करातेमा भाग लिने सबै ४ खेलाडीले पदक जितेका छन् । अनु अधिकारी, मलिका थापा र मुकुन्द्र महर्जनले स्वर्ण पदक तथा मन्डेकाजी श्रेष्ठले कास्य पदक जितेका छन् ।

जर्मनीमा शुक्रबार र शनिबार भएको प्रतियोगितामा अनुलले महिला ५० केजी र मलिकाले ५५ केजीमा स्वर्ण पदक जितिन् । अनुले फाइनलमा आयोजक जर्मन खेलाडीलाई ८–० ले हराएको मन्डेले हाम्रो खेलकुद डट कमलाई जानकारी दिए । त्यसअघि अनुले क्वार्टरफाइनलमा युक्रेनकी खेलाडीलाई २–१ ले र सेमिफाइनलमा ग्रीसकी खेलाडीलाई ७–३ ले हराइन् ।

त्यस्तै मलिकाले फाइनलमा जर्मन खेलाडीलाई २–१ ले हराइन् । त्यसअघि क्वार्टरफाइनलमा पोल्यान्डकी खेलाडीलाई २–० र सेमिफाइनलमा युक्रेनकी खेलाडीलाई हराइकी छिन् । मुकेन्द्रले फाइनलमा युक्रेनका खेलाडीलाई १ –० ले हराउँदै स्वर्ण पदक जितेका हुन् । त्यसअघि उनले क्वार्टरफाइनलमा जर्मन खेलाडीलाई ६–० ले र सेमिफाइनलमा पोल्यान्डका खेलाडीलाई हराएका थिए ।

मन्डेकाजी आयोजक जर्मन खेलाडीसँग क्वार्टरफाइनलमा ३–२ ले पराजित भएपनि पदक जित्न सफल भए । रिप्याचर बाउटमा उनले युक्रनेका खेलाडीलाई हराउँदै पदक जितेका हुन् । चारै खेलाडीले बालकुमार क्लबबाट सहभागिता जनाएका थिए ।