चिवतन (हाम्रो खेलकुद) – विभागिय टोली नेपाल एपिएफ क्लब र काठमाडौंको शिवम् न्यू डायमण्ड एकेडेमी चितवनको पटिहानीमा जारी प्रथम मेयर कप अन्तर्राष्ट्रिय आमन्त्रण महिला भलिबल प्रतियोगताको उपाधिका लागि भिड्ने भएका छन् ।

पहिलो सेमिफाइनलमा अर्काे विभागीय टोली नेपाल पुलिस क्लबलाई ३–० को सोझो सेटमा हराउँदै एपिएफ उपाधि नजिक पुगेको हो । एपिएफ २५–१४, २७–२५ र २५–१५ ले विजयी भएको थियो । सोमबार नै भएको दोस्रो सेमिफाइनल खेलमा न्यू डायमण्डले अर्को विभागिय टोली त्रिभुवन आर्मी क्लब ३–० को सोझो सेट हराउँदै अन्तिम दुईमा पुगेको हो ।

डायमण्डले आर्मीलाई २५–१४, २५–१२ र २५–२१ ले पराजित गरेको थियो । राष्ट्रिय खेलाडी प्रतिभा माली र मञ्जु गुरुङसहित फर्ममा रहेका  खेलाडीका साथमा न्यू डायमण्ड निकै बलियो देखिएको छ । फाइनल खेल्ने दुवै टोली प्रतियोगिताका अपराजित टोली हुन् ।

उनीहरुले केही दिनअघि मात्रै काठमाडौंमा सम्पन्न न्यू डायमण्ड कप भलिबलमा पनि फाइनल खेलेका थिए । यसमा न्यू डायमण्ड नै विजयी भएको थियो । प्रतियोगिताको अधिकांश उत्कृष्ट विधामा डायमण्डका खेलाडीले ट्रफी जितेका थिए । फाइनल र तेस्रो स्थानको खेल मंगलबार हुनेछ ।

प्रतियोगिता विजेताले उपाधिसहित २ लाख रुपैयाँ, दोस्रो हुने टोलीले १ लाख, तेस्रो हुने टोलीले ५०, चौथो हुने टोलीले २५ हजार रुपैयाँ प्राप्त गर्नेछन् । प्रतियोगिताको सर्वोत्कृष्ट खेलाडीले १० तथा विद्यागत उत्कृष्ट खेलाडीले समान ५ हजार रुपैयाँ प्राप्त गर्नेछन् ।

आधारभूत विद्यालय धनौजीको खेलमैदानमा भइरहेको प्रतियोगिताको समापन मंगलबार पूर्व प्रधानमन्त्री माधवकुमार नेपालले गर्ने आयोजक भरतपुर महानगरपालिका २२ नम्बर वडाध्यक्ष विष्णुराज महतोले जानकारी दिए ।