दिपक बोहोरा

पाँचथर– हिउँमा खेलिने आइस हक्की खेलको विकास गर्ने भन्दै पाँचथरमा आइस हक्की संघ गठन गरिएको छ । पाँचथर जिल्लाका केहि ठाँउमा वर्षमा आक्कल झुक्कल हिँउ पर्ने बाहेक जिल्लामा हिउनै पाइदैन । वरफमा माथि खेलिने खेलको विकास गर्ने भन्दै हिउनै नपाइने जिल्लामा आइस हक्की संघ गठन गरिएको हो ।

आइतबार सदरमुकाम फिदिममा आइस हक्की संघका केन्द्रीय सदस्य मुकेश दाहालको उपस्थितिमा आफु निकटका मानिसहरु भेला पारी संघ जिल्ला कार्य समिति पाँचथर गठन गरिएको हो । जसमा जिल्लाका खेलकुद संग सम्बन्धित धेरै व्यक्ति तथा संघ सस्थाहरुलाइ खबर नै नगरी समिति गठन गरीएको हो ।

दिपेन योक्पाङनको अध्यक्षतामा ११ सदस्यीय समिति गठन गरिएको छ । कुनै पनि खेलकुद संघ गठन गर्नु पर्दा जिल्ला खेलकुद विकास समितिको रोहबरमा संघ गठन गर्नु पर्ने प्रावधानलाई पनि लत्याइउको छ । जिल्ला खेलकुद विकास समितिका कार्यालय प्रमुख मात्रिका दाहालले संघ गठनको कुनै जानकारी नभएको बताएका छन् ।

जिल्लामा खेल संघहरु खेलको विकास गर्ने भन्दा पनि राजनीति गर्ने थलोको रुपमा विकास भइरहेको छ । जिल्लामा अस्तित्वमा रहेका अन्य खेलका संघले काम गर्न नसकेको भन्दै आलोचना भइरहेका बेला सम्भावना नभएको खेलको संघ गठन भएको छ ।