काठमाडौं (हाम्रो खेलकुद) – राखेप च्याम्पियनसिप अन्तर्गतको ३९ औं राष्ट्रिय टेबलटेनिस प्रतियोगितालाई विश्वमा नै सर्वाधिक विक्री हुने चाईनिज ब्राण्डको हुवाई मोवाईलले साथ दिने भएको छ ।

प्रायोजन सम्वन्धी सम्झौता पत्रमा हुवाईका जोयस झु (झु जियोङ), नेपालका लागि हुवाईका आधिकारिक विक्रेता कल मोविलिटीका कार्यकारी निर्देशक पुलकित भिमसरिया र अखिल नेपाल टेबलटेनिस संघका अध्यक्ष चतुरानन्द राज वैद्यले संयुक्त हस्ताक्षर गरे ।

सभ्झौता पश्चात उक्त प्रतियोगिताको नाम राखेप च्याम्पियनसिप अन्तर्गत ३९ औं हुवाई राष्ट्रिय टेबलटेनिस प्रतियोगिता रहने पत्रकार सम्मेलनमा जानकारी गराईयो । हुवाईका आधिकारीक विक्रेता कल मोविलिटीले प्रतियोगितालाई प्रायोजन गरेबापत नगद ५ लाख प्रदान गर्ने सम्झौता पत्रमा जनाइएको छ ।

प्रतियोगिताका लागि आवश्यक २३ लाखमा राष्ट्रिय खेलकुद परिषदले १० लाख प्रदान गरेको र प्रायोजन बापत प्राप्त ५ लाख गरि १५ लाख भएको र अपुग रकम संघ आफैंले व्यहोर्ने अध्यक्ष वैद्यले पत्रकार सम्मेलनमा जानकारी गराए । खेलाडीहरुको खाने, बस्ने र आउनेजाने भाडा संघले व्यहोर्ने समेत अध्यक्षले जानकारी गराए ।

प्रतियोगिता लैनचौरस्थित टेबलटेनिस प्रशिक्षण केन्द्रमा पुस २६ देखि २९ गते सम्म संचालन हुनेछ । प्रतियोगितामा महिला पुरुष टिम ईभेन्टस्, महिला पुरुष एकल र जोडी तथा मिक्स जोडीमा प्रतिस्पर्धा गराइने टेक्निकल टिम संयोजक एवं अखिल नेपाल टेबलटेनिस संघका महासचिव शंकर गौतमले जानकारी गराए ।

प्रतियोगितामा ४५ टिमका करिब ३०० खेलाडीहरुले ७ स्वर्ण पदकका लागि प्रतिस्पर्धा गर्ने भएका छन् । यस च्याम्पियनसिपबाट १६–१६ महिला तथा पुरुष खेलाडी राष्ट्रिय टिमको लागि छनोट गरिने संघका महासचिव शंकर गौतमले जानकारी गराए ।