पोखरा (हाम्रो खेलकुद)– त्रिभुवन आर्मी क्लबका दुवै टोली (महिला र पुरुष) पोखरामा जारी राखेप च्याम्पियनसिपअन्तर्गत राष्ट्रिय ह्यान्डबल प्रतियोगिताको फाइनलमा पुगेका छन् । महिलातर्फ अर्को विभागिय टोली नेपाल एपिएफ क्लबको सामना गर्ने आर्मीले पुरुषतर्फको उपाधिका लागि पश्चिमाञ्चलसँग प्रतिस्पर्धा गर्नेछ ।

महिलातर्फको ९ औं राष्ट्रिय ह्याण्डबलको सेमिफाइनलमा एपिएफले पूर्वाञ्चललाई ३२–५ ले हराएको थियो । एपिएफका लागि उमा राईले १२ गोल गरिन् । उमा खेलको वमन अफ दी म्याच चुनिइन् । अर्को खेलमा शान्तिकला राईले २१ गोलको गरेपछि आर्मीले घरेलु टिम पश्चिमाञ्चलाई ३८–६ ले हरायो । शान्तिकला वमन अफ दी म्याच चुनिइन ।

पुरुषतर्फ १८ औं राष्ट्रिय ह्याण्डबलमा आर्मीले एपिएफ माथि २३–२२ ले हरायो । आर्मीका विकास राई म्यान अफ दी म्याच घोषित भए । अर्को सेमिफाइनलमा पश्चिमाञ्चलले मध्यपश्चिमाञ्चललाई ३७–१७ ले पराजित गर्यो । पश्चिमाञ्चलका प्रेम गुरुङ म्यान अफ दी म्याच घोषित भए ।

नेपालह्याण्डबल संघको तत्वाधान, कास्की जिल्ला ह्याण्डबल संघको आयोजना रहेको प्रतियोगितालाई हङकङ ब्यूटी इन्स्टच्युट प्रालिले मुख्य प्रायोजन गरेको छ । शनिबार हुने दुवैतर्फका फाइनलका विजेताले ३० हजार, दोश्रोले २० हजार र तेश्रो हुने टोलीले १० हजार रुपैयाँ प्राप्त गर्नेछ ।