पाँचथर (हाम्रो खेलकुद)– हाम्रो खेलकुद डट कमका पाँचथर संवाददाता दिपक बोहोरा सम्मानित भएका छन् । रुस्लान फाल्गुनन्द गोल्ड कप फुटबल प्रतियोगिताको आयोजक फिदिम स्पोर्टस क्लबले आज पहिलो सेमिफाइनलका दौरान बोहोरालाई सम्मान गरेको हो ।

सम्मानपछि हाम्रो खेलकुदकर्मी दिपक बोहोरा ।

फिदिममा जारी नवौं फाल्गुनन्दको सफलताका लागि पुर्याएको योगदानको कदरस्वरुप उनलाई सम्मान गरिएको हो । स्थानिय रेडियो मितेरीमा खेलकुद कार्यक्रम समेत चलाउँदै आएका बोहोराले प्रतियोगितामा मिडिया फोकल पर्सनका रुपमा समेत भूमिका निर्वाह गरिरहेका छन् ।

सोही अवसरमा प्रतियोगितालाई सहयोग गर्ने विभिन्न संघ संस्थालाई पनि सम्मान गरिएको थियो । आज भएको पहिलो सेमिफाइनलमा अग्नी रुपन्देही ११ लाई ३–१ ले हराउँदै सुनसरी ११ फाल्गुनन्द गोल्ड कपको फाइनलमा पुगेको छ ।

सुनसरीले आइतबार हुने फाइनलमा साविक विजेता विर्ता युनाइटेड वा मोरङसँग फाइनल खेल्नेछ । दोस्रो सेमिफाइनल भोली हुनेछ ।

फाल्गुनन्द गोल्ड कपको विजेताले उपाधि सहित ३ लाख, दोस्रो हुने टोलीले २ लाख रुपैयाँ प्राप्त गर्नेछन् । सवोत्कृष्ट खेलाडीले मोटरसाइकल प्राप्त गर्ने प्रतियोगिताका उत्कृष्ट गोलकिपर, रक्षक , मिडफिल्ड, फरवार्ड र प्रशिक्षकले समान १० हजार रुपैयाँ पाउनेछन् ।