काठमाडौं (हाम्रो खेलकुद) – नेपाली अल्ट्रा धाविका मीरा राईले हङकङमा भएको एमएसआइजी लान्ताउ ५० एसियन स्काइ रनिङ च्याम्पियनसिपको उपाधि जितेकी छन् ।

तस्विर: मीराको फेसबुक

आइतबार हङकङमा भएको स्काइ रनिङ च्याम्पियनसिपमा नेपाली अल्ट्रा धाविका मीरा राईले निर्धारित ५० किलोमिटर दुरी ६ घण्टा ५० मिनेट ३४ सेकेण्डमा पुरा गर्दै उपाधि हात पारेकी हुन् ।

मीराले दोस्रो स्थानमा आएकी जापानी धाविकालाई १ घण्टा भन्दा बढी समयले पछि पारिन् । जापानकी युकारी होसिनो र काओरी निवाले क्रमशः ७ घण्टा ५२ मिनेट र ८ घण्टा २ मिनेटमा सो दूरी तय गरेर दोस्रो र तेस्रो स्थान हासिल गरिन् ।

लिगामेन्ट इन्जुरीका कारण मीराले केही समय विश्राम लिएकी थिईन् । मीरा सन् २०१४ मा इटालीमा ५७, हङकङमा ५० किलोमिटरको एसियन च्याम्पियन र नर्वेमा ८० किलोमिटरको अल्ट्रा म्याराथन च्याम्पियन बनेकी थिइन् । राईले ‘नेशनल जोग्राफी एड्भेन्चरर अफ दि इयर २०१७’ उपाधि पनि जितिसकेकी  हुन् ।

पुरुषतर्फ भने स्पेनका क्रिष्टोफर क्लिमेन्ट विजेता बने। क्लिमेन्टले ५ घण्टा ४९ मिनेटमा दूरी पूरा गरे भने राईले ६ घण्टा ५० मिनेटमा सो दूरी पार गरिन्। त्यसबाहेक सो प्रतियोगितामा सम्पूर्ण पदक जापानी धावकहरुले हात पारे। पुरुषतर्फ मियुरा उइची र काजुआकी होसिनो क्रमशः दोस्रो र तेस्रो भए। मियुराले ६ घण्टा २ मिनेट र होसिनोले ६ घण्टा ३९ मिनेटमा सो दूरी पार गरे ।