सरोज र मनिष च्याम्प अफ च्याम्पियन्सको फाइनलमा

काठमाडौं (हाम्रो खेलकुद) – सरोज सेवा र मनिष डंगोल च्याम्प अफ च्याम्पियन्स (सीओसी) को फाइनलमा प्रवेश गरेका छन् । राजधानीको महाराजगञ्जस्थित जिमखानामा शनिबार भएको सेमिफाइनलमा ओखलढुङ्गाको सरोज सेवाले अर्घाखाचीको यादव थापालाई नकआउटमा पराजित गर्दै फाइनलमा पुग्न सफल भएका हुन् ।

अर्काे सेमिफाइनल मनिस डंगोल (कालोपुल) ले सुरेन्द्र कार्की (रौतहट)लाई अंकको आधारमा पराजित गर्दै फाइनलमा स्थान बनाए । म्याक्स बक्सिङ प्रमोशन र डान्सिङ याकले नेपालमा पहिलोपटक च्याम्प अफ च्याम्पियन्स (सीओसी) आयोजना गरेको हो । च्याम्प अफ च्याम्प जेठ महिनाबाट शुरु भएको हो । पहिलो चरणमा विभिन्न १६ बक्सरले सहभागिता जनाएका थिए ।

फाइनल खेल माघ १६ गतेलाई तोकिएको म्याक्स बक्सिङ प्रमोशनका प्रमुख म्याक्स बस्नेतले जानकारी गराए । सोही समयमा म्याक्सले पनि अजयदिससँग खेल्दै प्रो बक्सिङमा डेब्यु गर्नेछन् ।

यस च्याम्प अफ च्याम्पियन्सको विजेताले नगद २ लाख पुरस्कार हात पार्नेछ । दोस्रो हुनेले ३० तथा तेस्रो हुनेले १० हजार पाउनेछन् । यस्तै च्याम्पियनले बेल्जियममा गएर ३ महिना प्रशिक्षण गर्ने मौका पाउने म्याक्स बस्नेतले जानकारी गराए ।