काठमाडौं (हाम्रो खेलकुद) – अखिल नेपाल कबड्डी संघको आयोजनामा बिहिबारबाट शुरु भएको अन्तर्राष्ट्रिय आमन्त्रण पुरुष कबड्डी प्रतियोगितामा नेपालले बंगलादेशमाथि रोमाञ्चक जित निकालेको छ ।

तस्विर : विवेक सुवेदी /  हाम्रो खेलकुद 

त्रिपुरेश्वस्थित राष्ट्रिय खेलकुद परिषद (राखेप) को कवर्डहलमा भएको प्रतियोगिताको पहिलो खेलमा नेपालले बंगलादेशलाईलाई ३७–३५ को प्रतिस्पर्धात्मक अंकमा पराजित गरेको हो ।सुरुआत देखि नै खेलमा पछि परेको नेपाल एक समय २१–११ ले पछि रहेको थियो । तर, बंगलादेशका कप्तान मसुद करिम र अनवर हुसेनलाई लगतार आउट गरेपछि नेपालले खेललाई आफ्नो नियन्त्रणमा राख्न सफल भएको थियो ।

पहिलो हाफ सकिदा नेपालले २३–२५ ले पछि रहेको थियो । दोस्रो हाफमा उत्कृष्ट प्रदर्शन गरेको नेपालले बंगलादेशलाई दुईपटक अलआउट गर्दै ३१–३१ को स्थितिमा पुर्याएको थियो । बंगलादेशलाई अलआउट गरेपछि नेपालले पहिलोपटक ३४–३१ ले अग्रता लियो । त्यसपछि बंगलादेशले चार अंक जोड्दा नेपालले थप तीन अंक जोड्दै जित सुनिश्चित गरे ।

प्रतियोगिता अन्र्तगत शुक्रबार दुई खेल हुदैछ । पहिलो खेलमा बंगलादेशले भारतको सामना गर्दा दोस्रो खेलमा नेपालले भारतको सामना गर्नेछ । असोज ७ गतेसम्म चल्ने प्रतियोगितामा दक्षिण एसियामा नेपालसहित भारत र बंगलादेशको सहभागिता रहेको छ । श्रीलंकाले अन्तिम समयमा आफ्नो नाम फिर्ता लिएको कबड्डी संघका पशुपति प्रजापतिले जानकारी गराए । सुपर लिगको आधारमा भैरहेको प्रतियोगितामा अब शुक्रबारको खेलबाट शीर्ष दुई टोलीले शनिबार उपाधिको लागि खेल्नेछ ।