काठमाडौं (हाम्रो खेलकुद) – नेसनल एकेडमी अफ स्पोर्ट्स मेडिसिन पोखराले बजारमा ल्याएको खेलकुद विज्ञान सम्बन्धि जानकारी दिने पुस्तक ‘स्पोर्ट्स मेडिसिन’ सार्वजनिक भएको छ । खेलकुद विज्ञान सम्बन्धि जानकारी दिने पुस्तक स्पोर्ट्स मेडिसिनको युवा तथा खेलकुद मन्त्री राजेन्द्र कुमार केसीले बुधबार एक कार्यक्रमको बीच विमोचन गरे ।

पुस्तक विमोचन कार्यकममा बोल्दै मन्त्री केसीले खेलका दौरान खेलाडीले अनेक समस्याहरु भोग्ने गरेको बताउदै त्यसबारे जानकारी दिने यो पुस्तक खेलाडीहरुको लागि महत्वपूर्ण रहेको बताए । मन्त्री केसीले सम्भवत यो पुस्तक नै खेलाडी र खेलकर्मीको लागि दुवै माध्यम (अंगेजी र नेपाली) मा भएको पुस्तक रहेको बताए । यस्तै पुस्तक लेखनका अगुवा डा खड्काले पुस्तकले खेलाडी घाइते हुदा प्राथमिक उपचार, घाइते खेलाडीको सफल उपचार र खेलमा फर्कन सक्ने बनाउन सहयोग पुग्ने बताए ।

पुस्तकमा खेल खेल्दा लाग्ने चोटपटकबाट बच्ने उपाय, तिनको उपचार र घाइतेहरुको खेलमा पुनरागमनको लागि आवश्यक उपचार पद्दतिबारे चर्चा गरिएको छ । यस्तै पुस्तकमा खेलका क्रममा बढी आवश्यक पर्ने कुराहरु प्राथमिक उपचार, स्पोर्ट्स इन्जुरी, डाइट तथा न्युट्रिसियन, अभ्यास, ड्रग्स तथा डोपिङ र फिजियोथेरापी सम्बन्धि चर्चा गरिएको छ । पुस्तक विभिन्न क्षेत्रमा कार्यरत चिकिस्तकहरु डा. पदम बहादुर खड्का, डा चैतन्य अधिकारी, विजय काफ्ले, रबी राज बसौला, सरोज पाण्डे र सुस्मा क्षेत्रीले संयुक्त रुपमा लेखेका हुन् ।